Chennai, Nohprah:
Kumba la sakhi, la ong ba ki la don da ki hajar ngut ki briew ha Tirunelveli, Thoothukudi, Tenkasi bad Kanniyakumari distrik kiba dang ïakhun tyngeh ha kaba ïadei bad ka jingshlei um kaba la neh haduh mynta bad bun ki thaiñ ki dang ïakynduh jingeh na ka jingshlei um kaba la buh jingeh ïa ki kynhun ai jingïarap ban ïarap ïa ki.
Haduh ba la thoh ïa ka khubor, ki la don kumba 13 ngut ki briew kiba la ïap na ka daw jong ka jingshlei um ha kine ki ar sngi ba la leit naba ka jingshlei um kaba la neh haduh ba la thoh ïa ka khubor namar ka jinghap jong u slap uba jur.
Kum shi bynta ban ai ka jingkyrshan bad ka jingïarap sha ki nongshong shnong, u Myntri Rangbah jong ka jylla Tamil Nadu, u M K Stalin u la leit ïakynduh ïa u Myntri Rangbahduh u Narendra Modi ha ka sngi Ba-ar bad aiti ruh ïa ka dorkhas ha kaba ïadei bad ka jingïarap pisa kaba kyrkieh kaba long T. 2,000 klur ban lah ban pynkloi ha kaba ïadei bad ki jingpyllait im ïa ki briew ha ki saw tylli ki distrik.
“Ka Tirunelveli bad ka Thoothukudi ki la long ki jaka kiba la shah ktah jur naba ki la ïohpdiang ïa ka jinghap jong u slap kaba baroh shi snem tang ha ka shi sngi,” la ïathuh u Myntri Rangbah ha ka jingïakren bad ki nongthoh khubor ha New Delhi. “Ka jinghap jong u slap ha Tirunelveli bad Thoothukudi haduh mynta kumba la ïathuh ka kynhun IMD, ka la long ka jinghap kaba la dei ban hap ha baroh shi snem. Ki la don kumba 20 ngut ki Myntri, 50 ngut ki IAS bad ki IPS Officers bad 20,000 ngut ki nongïarap kbiba la don bynta ha ka ban pyllait im ïa ki lanot shlei um.
Ki la don kumba 12,653 ngut ki briew kiba la ïoh jaka sah ha ki 141 tylli ki jaka sah ba shipor. Ngi la dep ban sam ïa ka pisa kaba mar T. 6,000 sha man kawei pa kawei ka longïing ha Chennai bad ha ki lai tylli kiwei pat ki distrik khlem da ap ïa ka jingïarap pisa na ka sorkar kmie. Hynrei ka jingpyntreikam ha ka ban nang bteng ban pyllait im bad ban ai jingïarap ïa ki briew kan sa long tang lada la ïoh ban pdiang ïa ka jingkyrshan pisa na ka sorkar kmie,” u la ong.
