Itanagar, Nohprah:
Ha ka jingïakren kaba la long ha ka jingïalang bad ki nongthoh khubor ha ka Press Club ha kine ki khyndiat sngi ba la leit, ki dkhot jong ka Arunachal Pradesh Congress Committee (APCC) ki la buh ka jingdawa ba la dei ban don ka jingtohkit kaba bniah ha kaba ïadei bad ka jingjia kaba dang shen jong ka jingpynïap briew kaba la jia ha Tirap distrik.
Ka Committee ka la ban jur da kaba ong ba la dei ban pynïoh da ka kynhun Central Bureau of Investigation (CBI) bad ka National Investigation Agency (NIA) na ka bynta ban tohkit bniah halor ki jingjia jong ka jingshah pynïap ba sangsot jong u MLA barim jong ka seng Congress u Yumsen Matey ha ka sngi Saitjaiñ ba la dep bad u MLA jong ka seng NPP u A Tirong Aboh kaba la jia ha ka 21 tarik, Jymmang jong u snem 2019.
Kum shi bynta ban pynpaw ïa ka jingsngewkhia halor ka jingbym biang ki lad ai jingïada ne ki jingbym shngaiñ, u nongai ktien jong ka APCC u Zirdi Kadu ha ka jingai jingkren ha ki lad phah khubor, u la batai shai halor ka jingshah rahbor ba dang shen jong ki nongïalam shnong kiba kynthup ïa u Chopku Gangsa bad u GB Chijgsan Wangham ha ka 18 tarik, Naiwieng ba la leh da ka kynhun NSCN (K-YA) ha Longding distrik.
“Ki rukom pyntreikam jong ka sorkar kim shym la myntoi ei ei ha kaba ïadei bad ki jingai ïa ki jingïada na ka bynta ka jingim jong ki nongïalam ne ban ïada ha kaba ïadei bad ka jingshah rahbor jong ki briew bad ki kam dawa pisa na uwei u snem sha uwei pat u snem,” la ong u Kadu ha ka jingïalang bad ki nongthoh khubor.
U la ïai ban jur ban dawa halor ka jingwanrah ïa ka shongsuk-shongshngaiñ ha ka jylla bad u la buh ka jingkyrpad ïa ka sorkar jylla ba kan pynbiang ki lad ai jingïada lyngba ki pulit na ka bynta baroh ki kyrtong ki ban ïakhun ha ka General Election 2024.
Ka Committee ka la dawa ruh ba la dei ban pyntreikam kham bun ïa ki shipai ïada ha ka khappud Indo-Myanmar khnang ban pyrkhing bad khanglad ïa ka jingwan rungtuh jong ki riewsniew ne ki lehnoh.
