Chennai, Nohprah:
Ki la don kumba 400 ngut ki nongtong dohkha na Uvari, Koothankuli, Idinthakarai bad Koottapuli jong ka Tirunelveli distrik bad ka Chinnamuttam bad Thoothoor jong ka Kanniyakumari distrik kiba la ïoh ban pyllait im ïa palat 10,000 ngut ki briew da kaba pyndonkam da ki 72 tylli ki lieng tong dohkha ha Tirunelveli distrik naduh ka Lah Sngi U Blei bad ka Sngi Ba-ar na ka jingshlei um.
Kum ka jingpynpaw ïa ka jingsngewnguh sha ki nongtong dohkha, u Myntri ka sorkar u Thangam Thennarasu ha ka jingïakren bad ki nongthoh khubor u la ong ba kine ki nongtong dohkha ki la pyllait im ïa ki briew ha kiba bun ki jaka kynthup ha Tirunelveli Junction, Kokkirakulam, District Collectorate, Sindhupoonthurai, CN Kiramam, Kurukkuthurai, Nochikulam, Munneerpallam, Cheranmahadevi bad Ambasamudram.
“Kine ki la pynkynriah ïa ki briew sha ki jaka sah ba shipor ha kylleng ki distrik da kaba khlem kheiñ shuh ïa la kajong ka jingim,” la ong u Thennarasu. Haba ka kynhun jong ki nongthoh khubor, ka la ïakynduh ïa kine ki nongtong dohkha ha Tirunelveli Junction ha kine ki khyndiat sngi ba la leit, u P Amalan bad u J Ajesh from Koottapuli ki la ïathuh ba ki la ïoh ban pyllait im ïa ki briew wat lada ki dkhot jong ka longïing jong ki ki la shah ktah jur na ka jingshlei um ha ka shnong jong ki.
“Ngi la pynkynriah jaka ïa ki bahaïing jong ngi sha ki jaka sah ba shipor hashwa ban poi ka jingshlei um ha kine ki thaiñ. Ngi la ïoh ban pyllait im ïa ki hajar ngut ki briew, kynthup ki khynnah bad ki tymmen ki kro, kiba la sahkut hapoh ki ïing jong ki. Ngi la phah jingbam bad ka dud sha ki nongshong shnong jong ka nongbah lyngba ki lieng tong dohkha jong ngi. Kiba bun na ki lieng tong dohkha jong ngi ki la julor katba dang kit ïa ki briew sha ki thaiñ bapher bapher,” la ong u Ajesh.
Sa uwei pat u nongtong dohkha, ïa uba la tip kyrteng kum u S Liberty, u la ong ba ki khlem ïoh ban bam baroh shi sngi ha ka lah sngi U Blei naba ki la ïoh pdiang ïa ki jingkyrpad lyngba ki phone jong ki ban pyllait im ïa ki briew na kylleng ki jaka. U S Micheal u la ong ba kiba bun na ki para nongtong dohkha ki la mynsaw ha ka por ba ki la pyllait im ïa ki briew.
