Paris, Nohprah:
U President ka France, u Emmanuel Macron ha ka Sngi Balang u la ong ba ka jingiakhun jong ka Israel pyrshah ia ki kam thombor jong ki lehnoh ka la long palat pud ha kane ka kynti namar u la ong ruh ba ka jingiakhun pyrshah ia ki lehnoh Hamas kam dei pat ban long ka jingpynjot bad jingpynum ia ka Gaza namar hapoh Gaza ki don ki paidbah kiba lui-lui ba shong ba sah bad ki bym shym la don bynta ne don jingiadei eiei bad kitei ki lehnoh kiba la leit ban thombor dusmon ia ka Israel ha ka 7 tarik u Risaw jong une u snem 2023.
Kumta, u la ong ruh ba wat ai ba ka jingleh jong ka Israel kan ioh lad tang namar katei ka jingpynksan ban rat dyngkhong ia ki kam thombor jong ki lehnoh Hamas.
Namarkata, u Macron u la kyntu ia ka Israel ba ka dei ban pyrkhat thymmai bad ban ailad noh ia ki paidbah nongshong shnong ka Gaza ba kin ioh ban im biang ka jingim kaba suk-saiñ bad ba kin lait noh na ki jing kordit bad jingma jong ka thma. U la ong ruh ba ka Israel ka dei ban sngewthuh ba ka jingleit kput jong ka sha Gaza kam long tang ia ki lehnoh Hamas hynrei ka la ktah jur bun eh ia ki riew paidbah kiba lui-lui bad kiba shu long tang ki nongshong shnong ha Gaza bad kiba shah synshar ruh ha kitei ki lehnoh. Kumta u la ong ba kumba ka Israel ka kwah ban iada ia ki paidbah lajong, ka dei ruh ban pyrkhat naka bynta kitei ki mynsiem kiba lui-lui kiba lah ban shu um bad iap duh ei tang namar ka jignther bom naphang jongka sha kylleng ki bynta bapher jong ka Gaza la ka long nalor suiñ, na duriaw bad kumjuh ruh na ryngkew.
Watlakata, u Macron u la ong ba ka Israel ka don ka hok ba kan iada ialade. Pynban kam dei pat ban shim dusmon ia ka jingim jong ki paidbah na kiwei pat ki ri ba marjan bad ka dei ban ialeh kumno ban pynduna ia ka jingïap ki riew paidbah bad kan kput tang ia ki lehnoh kumba ka pynpaw ia ka jingthrang jongka ban pynduh jait bad ban tehlakam noh ia ki kam thombor ba shyrkhei jong katei ka kynhun lehnoh jong ka Palestine.
Ka thma hapdeng ki lehnoh Hamas jong ka Palestine napoh Gaza bad ka Israel ka la sdang ha ka 7 tarik u Risaw hadien ba kitei ki lehnoh Hamas ki la leit ban thombor ia ka Israel da kaba ther dusmon da ki spah- hajar tylli ki ‘namding shisien ther bad ki la leit ruh wat ban rung ha man ki thliew iing jong kito ki paidbah nongshong shnong ka Israel kiba don ha ki bynta khappud jong ka Israel bad ka Palestine. Ym tang katta, hynrei kitei ki lehnoh ki la pyniap dusmon naduh i khyllung ba dang rit haduh ki kmie- ki kpa tymmen kiba don ha kitei ki iing ha ka jingleit hiar thma jongki. Nalor kata, ki lehnoh Hamas ki la rahbor ruh da ki spah ngut ki briew na Israel khlem kheiñ shuh la ki long ki jong ka Israel ne kiba shu leit sah shipor ha Israel hynrei ki la kit naphang katba ki ioh.
Dei kane ka daw kaba la pyn bitar shla ia ka Israel bad kaba la pynlong ia ka Israel ba kan smai ban pynduh jait syndon ia katei ka kynhun lehnoh khnang ba kan nym lah shuh ban khyllie khlieh shuh biang hadien- habud bad kan nym don jingma shuh ia kino- kino ruh ki ri kiba don marjan bad ka Gaza ne ka Palestine.
