Da u Kitbor W. Nongrum
Shwa ban ka Snem Thymmai kan wan, ngi dei ban ïaid lyngba ka Sngi Khristmas. Kumta, uwei – pa – uwei u Paid Riewngeit uba long u Khristan u dap da ka jingkmen bad jingsngew shitrhem ban pdiang ieid naduh ka tyllong mynsiem ïa ka Sngi Kha U Jisu Khrist.
Katba nang jan ka Khristmas, ka mynsiem ka dap da ka jingkmen bakyrpang.Ha kiba don ka jingngeit baskhem ka don ka maian aiu – re kaba lah ban pynpalei ïa ka jingmut jingpyrkhat ha kaba ka dohnud jong ki ka shlei tang da ka jingieit bad ka jingkmen suda.
Wat la ka dei ka por tlang bakhriat bad tyrkhong, hynrei ka jingmut jingpyrkhat pat ka sngewsyaid bad sngewum naduh ki khynnah rit ba don ka bor sngewthuh haduh kiba la san.
Balei ïa U Jisu la kha ha sem skum ym ha ïing paki dulan ? Ka dei ka jingpynïaid bastad bad ba maian jong U Blei ba U la pynkha ïa u khunlung Jisu ha ka ïing – duk. Kane ka pynpaw ba U Jisu U wan sha ka pyrthei ban bet ïa u symbai jong ka jingsngewrit, ka jinglongduk, ka jingïaieit ka jingïashongsuk shongshngaiñ, ka jinglehbha markylliang bad khamtam eh ban lehsbun bad leh isynei ïa kiba duk basuk ne ki rangli juki. Dei U Jisu Uba wanrah ïa ka jingtngen kaba kyrsoi khlem kut trai ha ka dohnud u briew.
U Jisu U wan ban pynsuk ïa ka pyrthei bad ba ki para briew ki dei ban don ka jingïasngewthuh jingmut bad ïa ieit mar kylliang. U wan ban hikai ïa la ka jingïaishah. U Wan ban pyntngen ïa kiba sliang bad pynkdang ïa kiba thngan.
Ngi pdiang ïa U Jisu Khrist kum U Nongpynim, kumta ka mynsiem Khristan ka kyrsoi buk – buk na ka shadem la kum ba kyrsoi ka umpohliew kaba ai jingim. Kane ka dei ka sngi jong ka jingiaei, ka sngi jong ka jingpynim, ka sngi ka jingkmen, ka sngi ka jingpynthymmai ïa la ka jingim. Ka jingwan jong U Jisu Khrist sha ka pyrthei ka long ban pynim ïa ngi ki briew. “U Blei U la ieid katta katta ïa ka Pyrthei ba U aiti noh ïa la U Khun bamarwei ba baroh uba ngeit ha U un ym ïap, hynrei un ioh ka jingim bymjukut” (Io 3 : 16). U long u nongpynim ïa kiba pop, u long ka jingmap bad U long ka lynti sha U kpa na ka bynta ban ioh ïa ka jingim bymjukut.
U Blei Um kwah ba ngin jot ne ba ngin ïap ha ka ding jong ka dujok na ka pop jong ngi. Kumta u la phah noh da U Khun jong U ba la kha marwei ban ïalap ïa ka khubor babha, ban shah shitom bad ban shah ïap na ka bynta jong ngi da kaba kit noh ïa ki pop jong ngi.
Ha kane ka Sngi Khristmas ngi dei ban long kiba la kloi ban pdiang ïa U Jisu ban shong ha ka dohnud jong ngi. Kata hi kan hiar ka jingieit na U Blei. U Jisu U long ka lynti jong ka jingpynïasuk ïa ngi bad U Blei ba ngin dup ioh ïa ka jingim bymjukut. To ai ba ngin long kiba kloi ban pynthymmai ïa la ka jingim da kaba ngin pdiang hun mynsiem ïa ka jingwan – hiar U Nongpynim sha ka pyrthei. Hangta ngin shem ba ka jingim jong ngi ha ka pyrthei kan long kaba suk kynjai. Dem mane ha ka Dohnud bakhuid tam U Jisu Khrist bad dwai ha ka Dohnud batlem ka Maria Theisotti ba kan ïasaid lem na ka bynta jong ngi.
