New Delhi, Nohprah:
U Myntri ka tnad ka koit ka khiah ka Sorkar Pdeng, u Dr. Mansukh Mandaviya ha ka Sngi Balang u la kyntu ïa ki Jylla ban shim ïa baroh ki lad jingïada namar ka jingkiew ha ka jingdon jong ki briew kiba shah ktah ha ka COVID-19 hapoh ka ri, watla u la ong ba ki nongshong shnong kim donkam ban khuslai jingmut.
U Myntri u la ong ïa kane haba ai jingkren ha ka jingïalang khmih bniah lyngba ki kor ka juk stad ba mynta ha New Delhi bad ki Myntri ka tnad ka koit ka khiah jong ki Jylla bapher-bapher bad Union Territory halor ki jingpynkhreh ïa ki lad jingsumar ha kylleng ka ri.
Katkum ki jingtip na ka tnad ka koit ka khiah ka Sorkar Pdeng, ka jingdon jong ki briew kiba dang shah ktah ha ka COVID-19 ka long 2300 ngut ba kynthup ïa 16 ngut kiba khlad hapoh ka ri ha kine ki 2 taïew ba la dep.
Ha Kerela, ka jingdon jong ki briew kiba shah ktah thymmai ha ka jingpang ka long 292 ngut bad 3 ngut ki la khlad noh haduh ka 19 tarik u Nohprah, katkum ka jingtip na ka tnad ka koit ka khiah ka Sorkar Pdeng.
U Dr. Mandaviya u la ong, “Ka Sorkar ka long kaba la khreh barabor ban kyrshan ïa baroh ki Jylla bad Union Territory ban ïakhun ïa ka jingpang bad ngi la kyntu ïa ki Jylla ban pynlong ïa ki ‘Mock Drill’ ha baroh ki jaka sumar, shisien ha ka 3 bnai.”
“Ka la dei por ban ïatreilang. Ngi donkam ban long kiba husiar, hynrei ym donkam ban khuslai jingmut,” ong u Myntri.
Na ka liang u Dr. Mandaviya u la ban jur ban pynbun ïa ki jingpeit bniah bad ban ïakren bad ki briew.
Ha katei ka jingïalang, baroh ki nongmihkhmat jong ki Jylla ki la pynsngew sha u Myntri halor ki jingpynkhreh ha la ki jong ki jong ki Jylla.
Ïa katei ka jingïalang la pynlong namar ka jingkiew ba dang shen ha ka jingdon jong ki briew kiba shah ktah ha ki jingpang ring mynsiem kum ka ‘Influenza-like-Illness’ bad ka ‘Severe Acute Respiratory Illness’, kynthup ka COVID-19.
Na ka liang u Myntri Khynnah ka tnad ka koit ka khiah ka Sorkar Pdeng, u SP Singh Baghel, DG ka ICMR, Delhi, u Dr. Rajeev Bhal bad dkhot ka NITI Aayog ka koit ka khiah, Dr. V.K. Paul ki la ïadonlang ha ka jingïalang.
