Gaza, Nohprah:
U Hehduh jong ka Hamas u Ismail Haniyeh u la leit ban iuhkjat ha Egypt ha ka sngi Balang ban iakren halor kumno ban pynsangeh noh ia ka jingiasiat bad jingumsnam ha Gaza. Kane ka jingleit jong u Ismail sha Egypt ka long ban iakynduh ia katto katne ki heh ki haiñ jong kane ka ri.
Ha kajuh ka por ha kane ka jingleit jong u Ismail sha Egypt un sa iakynduh kyrpang ruh bad u hehduh ka tnat Egyptian Intelligence u Abbas Kamel lem bad kiwei kiwei .
Ha kane ka jingleit u Ismail sha Egypt kan sa don ruh ka jingiakren halor kumno ban wad ki lad ki lynti ban pynkut bad ban pynsangeh noh ia kane ka thma kaba la ktah shi kat dei ia ka Gaza bad kumjuh ruh ban ioh pyllait noh ia kiba la shah rahbor. Ha ka jingiakren kaba la long ha u bnai ba la leit ka Qatar ha ryngkat ka Egypt bad US ki la kyrpad ia ki lehnoh Hamas ban pyllait noh ia kiba la shah rahbor bad kumjuh ruh ka Israel ka dei ban pyllait noh ia ki 240 ngut ki nongshong shnong ka Palestine kiba ka la kem bad set ha ki patok kiba ha Israel.
Kawei na ki lad pathai khubor jong ki Hamas ka iathuh ba kane ka jingleit u Ismail sha Egypt ka dei kyrpang ban iakren halor ka shongsuk shongsain bad kumjuh ruh ban weng noh ia ka jingdon jong ki shipai Israel na u pud u sam jong ka Gaza Strip. Kane ka jingleit jong u Ismail sha Egypt kan dei ka sien balai ha kaba ka sien nyngkong ka la long ha ka 7 tarik u Risaw bud sa kaba ha u Naiwieng.
Ka khubor ka iathuh ruh ba dang ha ka sngi nyngkong mynta ka taiew u hehduh jong ka Israeli intelligence Agency Mossad u David Barnea, ula iakynduh bad u Myntri Rangbah ka Qatar u Sheikh Mohammed bin Abdulrahman Al Thani bad director ka CIA u Bill Burns ha Europe ban iakren halor ki jingiasoi kaba thymmai kumno ban pyllait noh ia kito kiba la shah rahbor. Naduh ba ka Hamas kala wan thombor iaka Israel ha ka 7 tarik u Risaw haduh 1,140 ngut ki nong Israel ki la duhnoh ia la ka jingim bad kine ki dei ki riewpaidbah bad ha kajuh ka por ki lehnoh ki la rahbor ruh haduh 250 ngut bad ki la dep pyllait ia kumba 129 ngut.
Ha kaba iadei pat bad ka jingleit thombor ka Israel ia ka Gaza haduh 19,667 ki nongshong shnong ki la duh ei ia la ka jingim bad kine ki dei ki kynthei bad khynnah.
