Shillong, Nohprah 21
Ka Games Technical Conduct Committee (GTTC) ka la ïai bteng ban pynlong ïa ka jingïalang ban pynkhreh ïa ka 5th Meghalalaya Games 2024 ka ban long ha Tura.
Kane ka lympung ka sah sa tang 24 sngi ban pynbit pynbiang ka ban sdang naduh 15 haduh 20 tarik u Kyllalyngkot. Ka organising committee ka la khmih lynti ban pynbiang ïa baroh ki jingdonkam na ka bynta baroh ki nongïashim bynta bad kumjuh ïa ki nongpeitkai.
Ïa kane ka jingïalang la pynïaid da u Jagdish Chelani (IAS) Deputy Commissioner ha ryngkat ka jingïadon lang u Bah John F. Kharshiing, Co-Chairman, Organi-sing Committee & Chairman, Games Technical Conduct Committee (GTCC) ha conference hall jong u DC, Tura, West Garo Hills district ha kaba la ïadon lang ruh ki dkhot jong ki 17 tylli ki Committee bapher bapher ba la lamkhmat da ki synjuk ïalehkai bad kiwei kiwei.
Kane ka jingïalang ka long ban khmih bniah la ki jaka ïalehkai ki la long ne em kiba la biang nadong shadong, ki jingdonkam, ki jingpynbiang ïa ka leit ka wan jong ki nongïalehkai, ki official bad kumjuh ki nongshah khot sngewbha bad kiwei.
Lah ban kdew ba na ka liang ka tnat ïalehkai jong ka Sorkar Jylla ka la rai ban pynlut haduh T.23 klur tyngka na ka bynta kane ka lympung ïalehkai ka ban long ha ka sien kaba nyngkong eh ha Tura.
Lah ban ong ba kane kan dei kaba heh duh ka jingpynlut da ka Sorkar Jylal ha baroh ki lympung ïalehkai kiba la lah ban pynlong hapoh ka Jylla bad ka la long ruh haduh phra shah na kaba la pynlut ha ka 4th Meghalaya Games jong u snem 2022 kaba la long ha ka nongbah Shillong kaba long tang T. 2.39 klur tyngka.
