Shillong, Nohprah 21
Ka shi kol ba la thep da u Reinjoywell Wartde ka la biang pura ïa ka Pohkseh Sports Club ban rah ïa ka nam lahduh ha ka lympung ïalehkai Second Division Football League ba la pynïaid da ka Shillong Sports Association. Kane ka wan urlong hadien ba ka la lah ban pynliem noh ïa ka Mawtawar SC da 1-0 kol ha ka Sngi Palei ha SSA Stadium, Polo.
Ha kane ka jingïakhun final baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol. Hadien shiteng kynta ka Pohkseh ka la ïoh ïa ka kabu kaba biang bha na ka bynta ban pynkhih jar nyngkong eh lyngba u Reinjoywell ha ka minit kaba 32.
Watla ka Mawtawar ka la pyrshang ban pynphai, hynrei kam shym la lah ban pynurlong haduh kaba kut ka jingïalehkai bad ka la hap ban mad ïa ka jingshah rem.
Lyngba kane ka nam jop ka Pohkseh SC ka la khur ïa ka khusnam pisa kaba T. 50,000 tyngka ryngkat ka trophy bad ka Mawtawar SC ka la ïoh ïa ka song pisa kaba T. 25, 000 tyngka bad ka trophy ba la sam da u Bah Banteidor Lyngdoh, MLA Mawkynrew konstitwensi kum u kongsan, ryngkat u Bah Brightstarwell Marbaniang, MLA ka Mawlai konstitwensi kum u symbud kongsan ha ka jingdon ryngkat u Bah Charles Pyngrope, MLA Nongthymmai, ki nongïalam ka SSA bad kiwei kiwei.
Ka khubor kaba sngewtynnat na ka bynta kine baroh ar tylli ki kynhun ka long ba ka Pohkseh SC bad ka Mawtawar SC ki la kiew sha ka kyrdan First Division ha kaba kin ïoh ban ïalehkai naduh u snem ban wan.
Kum ban shu pynkynmaw ha kane ka lympung ïakhun jong ka Second Division ki don ar tylli ki Group, ka A bad ka B. Ha ka Group A, ka don ka Sohryngkham, Mawtawar, Nongkrem, Jongksha, Marbisu, Laitlyngkot bad ka Sohiong SC. Katba ha ka Group B ka don ka Pohkseh, ka Nongrah, Laitkyrhong, Umphrup, Smit, Lum-shyiap bad Imson FC.
