Guwahati, Nohprah:
Ki la don kumba saw ngut ki briew kiba la thmu ban rung ha ka kam saiñ pyrthei kiba la kwah tiket na ka seng Congress na ka bynta ban ïakhun ha ka ilekshon Lok Sabha.
Nalor ki lai ngut ki dkhot jong ka seng ha Lok Sabha, arngut ki dei u Pradyut Bordoloi bad u Abdul Khaleque kiba la kwah tiket. Uba lai u dei u Gaurav Gogoi ha kaba ka seng ka dang ïakren ban pynïoh ïa ka tiket, la ïathuh ka tyllong khubor kaba la wan na ka seng.
Ki la don kumba 11 ngut kiwei pat kiba la kwah ïa ka tiket na ka seng kiba na Dhubri, kaba la bun tam ha ka jingbun kiba kwah tiket haba ïanujor bad kiwei pat ki konstitwensi.
Ki konstitwensi kiba duna eh kiba kwah tiket na ka seng Congress ki la long mar arngut kata ha Kokrajhar bad Kaziranga konstitwensi. Ka tarik kaba khatduh ban phah ïa ki phom ka la long ha ka 19 tarik, Nohprah ha kaba nangne la pynjlan shuh shuh sha ka 22 tarik, Nohprah.
“U President jong ka PCC ha Assam u Bhupen Kumar Borah u la rai ban nang pynjlan shuh shuh ïa ka tarik ha kaba ïadei bad ka jingpdiang ïa ki aplikeshon na ka bynta ki kyrtong jong ka INC ki ban ïakhun ïa ka ilekshon Lok Sabha 2024 sha ka 22 tarik, Nohprah, 2023,” la ong ka jingthoh kaba la phah da ka seng.
Ka Assam ka la don 14 tylli ki Lok Sabha konstitwensi, ha kaba 9 tylli ki dei kiba la bat da ka seng BJP, 3 tylli da ka seng Congress bad mar kawei da ka All India United Democratic Front (AIUDF) bad ka Independent.
