Shillong, Nohprah 21
Ka rynsan ïakhun kti ba la tip kum ka ‘Shillong Arm Fight 2023, All India Arm Wrestling Championship’ ka la poi sha kaba kut ha ka sngi Palei ha kaba u Dipankar Mech na Assam bad ka Yogesh Choudhury na Haryana ki la rah ïa ka nam lahduh.
Ha kane ka rynsan ïakob kaba ar sngi kynthih la pynlong ha U Soso Tham Auditorium ha kaba la wan ïashim bynta da ki nongïalehkai na kylleng ki bynta jong ka ri kynthup ïa kiba na kane ka Jylla.
Ïa kane ka lympung la pynïaid da ka People’s Federation of Arm Wrestling India ha ryngkat ka jingïasnoh kti lang ka Bouncers Association of Meghalaya bad ka Treilang Welfare Society. La kyrshan lang ïa kane ka lympung da ka tnat ïalehkai ka Sorkar Jylla.
Ïa kane ka lympung la wan ban plie da ka Myntri ka tnat ka koit ka khiah ka Dr. Ampareem Lyngdoh ha ka sngi Balang bad la wan ban pynhap pyrda da u Myntri Rangbah ka Jylla u Conrad K. Sangma ha ka sngi kaba bud na ka bynta ban sakhi ïa ki jing-iakhun final jong ki shynrang bad ki kynthei.
Haba ai jingkren ha katei ka sngi, u Myntri Rangbah ka Jylla u la pynpaw halor ki jingïaleh ka Sorkar ban kyntiew ïa ki kam ïalehkai ha ka Jylla. “Ha kine ki san snem ba la leit, ngi la ïaleh ban kyntiew ïa ki jingïalehkai bapher bapher bad ruh ngi la pyrshang ban pynbiang ïa ki jaka ïalehkai. Ngi la ïoh ruh ban pynlong ïa ki lympung ïalehkai bapher bapher ha ka nongbah kum ka Grandmaster Chess Tournament kaba la poi sha kaba kut hynnin ka sngi,” u la bynrap.
“Ka All India National Boxing Championship, All India Table Tennis Championship ki la long long kiwei pat ki lympung ïalehkai ki la lah ban pynlong ha ka nongbah Shillong. Ka long ka jingsngewkmen ban sakhi ba ka Jylla ka la ïoh ban pynlong ïa ki lympung ïalehkai bapher bapher.”
Haba pynpaw halor ka jingdon ïa ki sap ïalehkai ba kyrpang, u la pynpaw ruh shaphang ka Star Programme na ka bynta ban ithuh ia ki sap ïalehkai jong ki khynnah bad ruh ban ai jinghikai ïa ki. “Ki la don haduh 25,000 ngut ki khynnah kiba la shah bishar bniah na ka bynta ban ithuh ïa ki sap ïalehkai ba kyrpang jong ki bad tang kito kiba la shah jied kiba la ïoh ka jingshah hikai pura,” u la bynrap.
U la pynpaw ruh ba ki la don sa tang 12 ngut ki khynnah ïalehkai kiba la shah jied na ka bynta ban ïoh ka jingshah hikai kaba paka. “Ngi la ithuh ïa ki sap ïalehkai jong ki khynnah lyngba ki kot ki bor ka juk mynta, hynrei kaba sah mynta ka long ban sei ïa ki lyngba ka jingai jinghikai kaba paka, khnang ba ki lah ban ïashim bynta ha ki lympung ïalehkai hapoh ka ri bad wat shabar ruh kumjuh,” u la bynrap da kaba ïathuh shaphang uwei u khynnah ïalehkai uba dang 14 snem ka rta uba la lah ban thaw ïa ka rekod hapoh ka ri ha ka Long Jump.
Haba phai sha ka kyrdan ïakhun jong ki nongïa -shim bynta kiba duna ha ki dkhot met (differently abled) u Hubert L. Nong-lait u la khur ïa ka takma ksiar, ia ka takma rupa bad rnong la khur da u Graham Jones Kharbani bad u Name Nangsan Kupar K. Warjri. Ha ka standing category u Johnbor -lang Pyngrope, Nihi Lamare bad u Marelad Kanai ki la khur ïa ka takma ksiar, rupa bad rnong.
Ïa ka takma ksiar ha ka 55 Kg jong ki shynrang la jop da u Daniel Nong-khlaw, katba ïa ka takma rupa bad rnong la khur da u Hubert Paliar bad u Banshanlang Terang. Kumjuh ruh u Nilay Sankar , Razedul Ali bad u Revel Born Star Snaitang ki la khur ïa ka takma ksiar, rupa bad rnong ha ka 65 Kg.
Ïa ka takma ksiar la khur da u Deepankar Mech ha ka 75 Kg, katba ïa ka takma rupa bad rnong la khur da u Jackson Lyngdoh bad u Alexion Roy Mylliem Umlong. U Tridip Medhi, Alan S. Marbaniang bad u Kishore Chettri ki la khur ïa ka takma ksiar, rupa bad rnong ha ka 85 Kg. Katba ha ka kyrdan ïalehkai jong ka 85+Kg la jop da u Bakham Maian Khong-wir, Banbatjuban Khong-wir bad u Ishan Kashyap kiba la khur ia ka takma ksiar, rupa bad rnong.
Haba phai ha ka liang ki kynthei, ka Angelis Kharumnuid ka la khur ïa ka takma ksiar ha ka 50 kg, katba ïa ka takma rupa bad rnong la khur da ka Airikmen Shabong bad ka Milartita Lyngdoh Nong-bri. Ha ka 55 Kg la khur jingjop da ka Bandarika Kharkongor, katba ïa ka takma rupa bad rnong la khur da ka Senebi Syngkli bad ka Angel Mary Mylliem Umlong.
Ka Wandalin Syiem-ïong, Payal Bhommik bad ka Olivia Dkhar ki la khur ïa ka takma ksiar, rupa bad rnong ha ka 60 Kg. Ka Margareth Pathaw, Aibok -lin Rina bad ka Yimri Jagoi ki la khur ïa ka takma ksiar, rupa bad rnong ha ka 65 Kg. ha ka 65+ Kg, ka Yogesh Chaudhury, Soram Rani bad ka Ribasuk Lyngdoh Mawphlang ki la khur ïa ka takma ksiar, rupa bad rnong.
