Chennai, Nohprah:
Ka Madras High Court hynnin ka sngi ka la rai pynrem ïa u nongïalam jong ka seng DMK bad u Myntri jong ka Tamil Nadu u K Ponmudy ban set patok lai snem bad ka kuna kaba T. 50 lak halor ka jingdonkti ban kamai ïa ka spah bymhok.
Une u Myntri bad ka kurim jong u ki la phah ïa ka Medical Record jong ki bad ong ba kane ka mukotduma ka dei kaba la rim bha bad mynta u Myntri u la don ha ka rta kaba 73 snem katba ka kurim jong u ka la don ha ka rta kaba 60 snem. Kine ki shijur ki la buh ka jingkyrpad ban pynjem noh ïa ka rai pynshitom kaba long pyrshah ïa ki.
U Myntri u la shah rai ban shong patok lai snem bad la daiñ kuna ruh mar T. 50 lak ïa u bad ïa ka kurim jong u. Ka rai pynrem ba la ai da ka Madras High Court ka la sangeh treikam da 30 sngi, kum shi bynta ban ailad ïa kine kiba la shah rai pynrem ba kin leit buh ka jingkyrpad ne jingmudui halor kane ha ka ïingbishar kaba kham halor.
Ka mukotduma Directorate of Vigilance and Anti-Corruption (DVAC) pyrshah ïa u Ponmudy bad ïa ka kurim jong u ka la long ha u snem 2002 ha kaba por ba ka sorkar AIADMK ka dang don ha ka bor synshar naduh u snem 1996-2001, ha kaba la ong ba kine ki shijur ki la don ïa ka spah kaba la kot sha ka T. 1.4 klur kumba la kynnoh ba ka la wan na ka jingkamai bymhok jong ki.
