Shillong, Nohprah 21
Ka Meghalaya Cricket Association ka la pynlong ïa ka ‘Annual General Meeting’ (AGM) ha ka sngi Ba-ar ha kaba la shim ïa kiba bun ki rai na ka bynta ban kyntiew ïa ka jingïa -lehkai kriket hapoh ka Jylla.
Baroh ki synjuk ïaleh-kai kiba la pynïasoh sha kane ka synjuk ka Jylla ki la wan ïashim bynta lang ha kane ka jingïalang kaba kyrpang. U Secretary ka MCA, u Bah Gideon Kharkongor, u la wanrah ïa ka kaiphod jong baroh shi snem, ha kaba la pynbud ïa ka kaiphod sa na u Treasurer u Dhrubajyoti Thakuria.
Ïa kane ka jingïalang la pynïaid da u President ka MCA u Nababrata Bhatta -charjee ha kaba la ïadon lang u Deputy Account General jong ka ophis u Principal Accountant General, Meghalaya nalor ki dkhot jong katei ka synjuk bad kiwei.
Kawei na ki rai kiba ka la shim ha kane ka jingïalang ka long halor ka jingkynthup ïa ka Eastern West Khasi Hills District Cricket Association (EWKHDCA) kum kawei ka synjuk kaba thymmai kaba la pynïasoh sha ka MCA khlem da donkam ban pynlong ka jingthep vote bad haduh mynta ki la don haduh 11 tylli ki district association kiba long ki dkhot hapoh ka MCA.
Ha katei ka jingïalang la thung ruh ïa u Justice Aloke Chakrabarti, u nongbishar ba la shongthait jong ka Allahabad High Court, kum u ‘Ombudsman and Ethics Officer’ jong ka MCA na ka bynta ka samoi treikam kaba dangsah sa shi snem.
Shuh shuh ka MCA ka la rai ban plie ïa ki shlem ai jinghikai kriket (junior cricket academy) ha baroh ki district na ka bynta ki khynnah shynrang bad kynthei khnang ban kyntiew ïa ki ha ka kam ïalehkai kriket.
Ka thong ban pynlong hapoh kine ki shem ai jinghikai ka long naduh 8 haduh 15 snem ka rta. Hadien ba ki khynnah ki la kynjoh sha ka rta kaba 15 snem ka long kaba biang eh ïa ki ba kin ïoh ban mihkhmat ïa ki district bad ruh ban mihkhmat ïa ka kynhun ïalehkai ka Jylla. Da ka jingïoh lad ban ïashim bynta ha ki lympung ïalehkai jong ka BCCI bad ha ki National Cricket Academy kan long ka jingïarap ban nangkyntiew shuh shuh ban saidur ïa ka lawei ka jong ki.
Ha kawei pat ka liang ka MCA kan ïaleh katba lah ban sei shuh shuh ïa ki coach, ki umpire, ki scorer, physios, trainer bad kiwei ha ki district level. Kane ka synjuk ïalehkai kan kyrshan lang ruh ïa baroh ki district na ka bynta ban sei ïa ki nongïalehkai kiba don sap, ki prokram ai jinghikai, ki inter-school tournament bad kiwei.
