Shillong, Nohprah 21
Ka long shisha ka jing-sngewsarong halor ka jingdon ki samla kiba la wanrah nam bad burom ïa ka Jylla baroh kawei lyngba ki sap ki phong bad ki jingtrei shitom jong ki ha ki bynta bapher bapher jong ka kam kaba ki don.
Ha ka pyrthei jong ka jingïaleh ban kilan bad pynwandur ïa ka met ka phad mynta la sakhi ba ka jylla Meghalaya ruh kam duna shuh ïa ki briew kiba lah ban pynïaryngkat kyrdan bad kiwei pat ki briew kiba hapoh ka Ri ne wat shabar ruh ha kaba la sakhi ba ki la don haduh 8 ngut ki samla kiba kynthup ïa arngut ki kynthei bad 6 ngut ki shynrang kiba la ïoh ïa ki khusnam bapher bapher ha kawei na ki jingïakop jong ka Mr & Ms India 2023 kaba la pynlong da ka World Fitness Federation ha Jaipur Rajasthan naduh 15 haduh 17 tarik mynta u bnai.
Kine ki 8 ngut kiba la ïoh ïa ki khusnam bapher bapher ha ka liang ki kynthei ki kynthup ïa ka samla Whitney Maqueen Lyngdoh Mawphlang kaba la ïoh rah ïa ka nam lahduh ha ka Women’s Sports Model bad wan ba-ar ha ka kyrdan jong ka Bikini Model. Ka Sawakani Lakiang kaba la jop ruh ïa ar tylli ki khusnam kiba kynthup ïa ka kyrdan jong ka Women’s Sports Model kaba la wan ba-ar bad kyrdan jong ka Bikini Model ha kaba la wan balai.
Katba ha ka liang ki shynrang pat u samla Vivian Pajuh uba la wan ba-ar ha ka kyrdan jong ka Men’s Bermuda Beach Model Short nangta u Ebenesar Khongsit uba la wan balai ha ka Men’s Body Building Fitness Category, u Wanraplang Thubru ba wan balai ha ka kyrdan Men’s Body Building Super Body, Pyndapbor Dkhat ba wan balai ha ka Men’s Body Building Junior Category, BadonKupar Kharbhih uba la wan ha ka kyrdan kaba 6 ha ka Men’s Body Building Athletic Category, bad ruh u Lalremmawia Sangma uba la ïoh ïa kajuh ka khusnam ha kajuh ka kyrdan.
Kine ki samla baroh ki dei kiba la jied kyrpang da ka Meghalaya Body Building and Fitness Federation na ka bynta ban mihkhmat ïa ka Jylla sha kane ka jingïakop pyni dohksah kaba heh ha ka Ri. Nalor ki khynnah samla napoh ka jylla Meghalaya ki don ruh kiwei pat ki khynnah samla na kiwei pat ki jylla jong ka Ri kiba la wan ban ïashim bynta ha kane ka jingïakop.
Na ka liang ka seng Meghalaya Body Building and Fitness Federation ka sngewkmen ruh ban pyntip ba ki la don arngut ki riew rangbah kiba napoh ka Jylla kiba la ïadonbynta ha ka ban bishar ïa ki nongïashim bynta kiba kynthup ïa u Bah Flanagan Kharwanlang bad Bah Noel Tariang.
