Shillong, Nohprah 22
U Pushkar Raj Singh u la ïoh ban khyrwit ïa ka spah run na ka bynta ka Meghalaya ha ka sngi kaba nyngkong jong ka semi-final U-19 men’s Cooch Behar Trophy pyrshah ïa ka Arunachal Pradesh ha ka Sngi Thohdieng ha Anand, Gujarat.
Haba kam trai ban tied nyngkong hadien ba ka la jop ïa kynting pisa, ka Meghalaya ka la kamai 220 run bad shah pynkhyllem baroh ki nongtied ha ka pali banyngkong bad hadien ba wan beh ïa ka thong ka Arunachal ka la kamai tang 53/1. Te kumta ka Meghalaya ka dangtam da 169 run.
Ka Anand ka la ïoh ban pynlong ïa baroh ki jingïalehkai jong ka Arunachal ha kane ka aïom ïalehkai. Ka Meghalaya ka la lah ban pynliem teng ïa ka Arunachal ha kajuh ka jaka ha ka ’round robin stage’.
Ha kane ka jingïakhun u Pushkar u la lah ban ïalehkai bha ha shwa ba un shah pynhap wiket da kaba ïoh ïa ka spah run (111 run na ki 207 bol) kaba kynthup ïa 17 tylli ki ‘four’. Ha ka jingshisha ka Anand ka dei ka jaka ïalehkai kaba biang tam ïa u ha kaba u la lah ban kamai 79 run ha ka jingïalehkai ’round robin’ pyrshah ïa katei kajuh ka kynhun dangshen mynta u bnai.
Lyngba ka jinglah ban kamai ïa katei ka spah run lem bad 42 run ba la tied da u kapten u Dipankar Baruah, ka Meghalaya ka la don jingkyrmen ba kan kynjoh sha ki 300 tam ha ka jingkamai run, hynrei ki nongkawang bol ka Arunachal, khamtam u Harsh Sharma (5/66) u la lah ban ïalehkai bha da kaba ïoh pynhap wiket.
Ha kane ka ‘inning’ u Dipankar u la lah ban khyrwit 10 tylli ki ‘four’ bad 2 tylli ki ‘six’. Nalor ki 62 run ba la ïatied lang na ka bynta ka wiket kaba lai, ka Meghalaya ka shem jingeh ban kamai run, watla u Avinash Rai (12) bad u Kishlay Vishlux (15) ki la pyrshah ban ïakhun tyngeh.
Te kumta ka Meghalaya kan hap ban ïalehkai bha na ka bynta ban khanglad ïa ka liang pyrshah ban kamai tang haduh 150 run khnang ba kan kynjoh sha ka thong.
