Dahejia, Nohprah:
Katkum ki khubor la ong da ki khat’ ngut ki dang jah rngai tat haduh jong ka Sngi Palei hadien u jumai ba 6.2 Magnitude u la pynkhynñiuh ia ka thaiñ Northwest jong ka nongbah Gansu hapoh China ha ka miet Sngi Nyngkong.
La ong ba ki bor pyniaid ka China ki la phah ia ki tnat ban leit iarap bad leit pyllait im ia kiba ngat ha utei u jumai ha katei ka step Sngi Ba-ar bad ka jingiarap ka dang iai bteng baroh shi miet haduh ka por 3 baje jong ka step Sngi Ba-ar hadien ba utei u jumai u la pynkhynñiuh ia katei ka thaiñ.
Ha katei ka thaiñ Gansu, la shem ba ki don kumba 115 ngut kiba la khlad na utei jumai bajur katkum ka kaiphod kaba la ioh lum jingkheiñ tat haduh ka step Sngi Balang bad 784 ngut pat kiba la shah ktah bad mynsaw ha ka jingkhynñiuh jong utei u jumai.
Katba ha ka Qinghai ka nongbah ba marjan la iathuh ba ka jingdon kiba khlad ka la kiew sha ka 22 ngut bad 198 ngut kiba la mynsaw. Katba 12 ngut pat ki dei kiba dang jah rngai naduh katei ka sngi. Une u jumai u la ktah ia kumba 1,45,000 ngut ki paid nongshong shnong jong katei ka nongbah.
Shuh shuh ruh la iathuh ba palat 2,07,000 tylli ki iing briew ki la julor bad kumba 15,000 tylli pat ki ïing mala ki la khyllem bad um ha utei jumai hapoh ka nongbah Gansu. Kane ka la ktah ia kumba 1,45,000 ngut ki briew kiba long ki nongshong shnong jong katei ka nongbah bad kiba la duh noh ia ki iing- ki sem bad ki baieid-bathoiñ ha katei ka jingjia sniew bok bad sngewsih.
Katkum ki jingiakren ba la iohi ha ki rynsan Social Media, la iohi ba kitei ki bor pyniaid ki la ialeh shitom katba lah ban pynkloi ia ki lad jingiarap bad ban phah ia ki briew na ki kynhun bad ki tnat iarap bapher jong ka ri khnang ban ioh ban leit pyllait im ia kitei kiba ngat ha kum katei ka jingjia.
La ong ba kitei ki briew kiba la ngat bad sahkut hapoh ki kynrum-kynram kiba la twa bad julor, ki la ioh mad ia ka jingkhriat bad jingdait-thah kaba 10 Degree Celsius. Kumta ka don jingma ba ki lah ban ioh ia ka ‘Rapid Hypothermia’ bad ki lah ban im sa tang kumba 10 kynta eiei wat lada ki khlem mynsaw eiei.
Nalor kata, la ong ba kito kiba dang jah rngai ki lah ban shu khlad noh kumto ruh hadien 24 kynta ba ki la sahkut ha ki jaka ba ki don bad kiba la julor bad twa.
