Ng. Khonglah, Sohkha Model
1.Emmanuel (U Blei lem bad ngi) Bethlehem haduh Lum Kalbari.
2.Emmanuel (U Blei lem bad ngi) Pentakos haduh jingwan Ar sien.
3.Emmanuel (U Blei lem bad ngi) Jingwan Ar sien haduh ba kut ka 1000 snem, ka jingsynshar U Jisu Khrist ha ka pyrthei ka ban bteng shaduh bymjukut.
BETHELEHEM HADUH LUM KALBARI
ïa ka jingwanlong briew U Blei sha ka pyrthei la ïathuh lypa nyngkong eh ha ka Kitab Jenesis 3 : 15, kumba 4000 snem shwa ban kha.
Ha ka 8 cent, B. C. U Isaiah U ïathuhlypa pat kham bniah shaphang ka ban kha na ka thei sotti khlem ka jingshong kha (without sex relation) bad no badno, bad ruh shaphang ka jingmut ka kyrteng jong u, ym ïa ka kyrteng jong u.
Ha kajuh ka spah snem u Mikah u ïathuh lypa ha ka rukom kaba kham shai shuh shuh.U ïathuh wat ïa ka shnong kaba yn kha ïa u, bad ba un sa long u nongsynshar ha Isreal, bad un long uba khraw haduh kaba kut ka pyrthei. Mikah 5 : 2-4.
Shwa ba ka Mari kan kha ïa u khunlung, u angel u Trai u la paw ha u Joseph ba ka jingphohsniew, u da ong, ko Joseph, u khun U Dabid, wat sheptieng ban shim ha me ïa ka Mari ka tnga jong me, naba ita iba la pun ha ka I long na u mynsiem Bakhuid, kan kha ruh ïa u khun, men khot ruh ïa ka kyrteng U Jisu, naba un pynim ïa ki briew ïa ki pop jong ki. La leh ïa kane baroh te, ba kumta yn pyndep ïa kata kaba la ong U Trai da u nongïathuhlypa, u da ong. Ha khmih kata ka theisotti kan pun khun, kan kha ruh ïa u khun, bad ki khot ia ka kyrteng jong u u Emmanuel, ka long haba batai, U Blei lem bad ngi.” Mat 1 : 20 – 22.
Kumta U Jisu u la san bad rangbah bad la ki kmie ki kpa haduh ba u dap 30 snem. U im kum u briew hapdeng jong ki briew. Haba la pynbaptis ïa u, la plie ïa ki bneng, bad u Mynsiem U Blei U la hiar ha u ha ka dur kum ka paro, bad u la wan shong ruh ha u. Ha khmih ruh ka ktien na bneng ka da ong, une u long u khun jongnga uba nga ieit, ha u ba nga sngewbha eh. Mat 3 : 16 – 17.
Kumta ka sdang ka lynnong kaba nyngkong ba U Blei u wan shong lem ryngkat bad ki briew khamtam bad kiba ngeit ha u, haduh ba U Jisu Khrist U la aiti ïa lade ban kñia ïa lade namar ki pop jong ka pyrthei ha lum Kalbari. Ynda U Jisu Khrist U mihpat na jingtep u iehnoh ïa la ki synran bad ka pyrthei, bad kiew sha bneng, sha u kpa uba la phah ïa u. Bad kut noh ka lynnong ba nyngkong. U Blei lem bad ngi.
PENTEKOS HADUH JINGWAN AR SIEN
Ka jingwan hiar u Mynsiem ba khuid ha ka sngi pentekos ka dei ka jingsdang jong ka lynnong kaba ar jong kata ka jingwan shong U Blei lem bad ngi. Emmanuel, hadien ba ka don ka jingsangeh (pause) katto katne sngi. Ha kane kaba ar. U Blei U mynsiem u wan shong syndon ha ka dohnud jong kita kiba ngeit ha u. Ka dei ka jingwan shong U Blei lem abd ngi hi (kiba ngeit). Ka dei ka jingpyndep U Jisu Khrist ïa ka jingkular ïa la ki jong ki synran, kaba u ong, ngan dwai ïa u kpa ba un phah ïa uwei pat ha ka jaka jongnga, u ban shong sah (to abide with you) bad phi.” U dei u bynta uba lai jong ka jinglong lai ha uwei jong U Blei. (Ioh 14 : 15).
Kane ka lynnong kan kut haduh ka jingwanshaw U Jisu Khrist ïa la ka jong ka Balang na ka Jingrongnoh. Ngi dei ki briew kiba don bok shisha,kiba U Blei U Mynsiem U wan shong ha ka dohnud jongngi, ka mut hi, U Blei lem bad ngi. Emmanuel.
KA JINGWAN AR SIEN HADUH BA KUT KA 1000 SNEM
Hadien ka jingrongnoh U Blei U Mynsiem um don shuh bad ki briew kiba dang sah ha ka pyrthei.Kumta, ka sdang kata ka jingjynjar bah ba khraw ha ka pyrthei baroh kawei. Ka bym pat ju jia, bad ka bym nym jia shuh lano lano.Ynda kut kata ka jingjynjar bah ba neh 7 snem, U Trai Jisu Khrist un wan pat ha ka burom bad da ka bor ban pynïeng ïa kata Hima U Blei ha khyndew kum ba ha bneng. Bad un shong ryngkat bad ki briew, ban synshar ïa ka pyrthei baroh kawei shi hajar snem na Jerusalem ka nongbah ka pyrthei. Baroh kawei ka pyrthei kan mane syiem ïa U Jisu Khrist. Un long U Syiem jong ki syiem,U Trai jong ki trai, “naba kumta te U Blei U la kyntiew eh ïa U, bad u la ai ha u ïa ka kyrteng kaba halor ki kyrteng baroh, ba ha ka kyrteng U Jisu Khrist ka khohsiew baroh kan ioh dem khrup, ki jong kiba ha bneng bad ki jong kiba ha ka khyndew bad ki jong kiba hapoh ka khyndew keiñ, bad ba u thylliej baroh un ioh phla shynna ba U Jisu Khrist U long U Trai ia ka ban pyndonburom ïa U Blei U ba u kpa” Phil 2 : 9 – 11.
Kumta ngi la sngewthuh bad tip ïa ka jingmut ba shisha bad ba pura Emmanuel. U Blei lem bad ngi. Bad ka hima jong u kan ban neh sha ki bymjukut ryngkat kiba la ngeit ha u, kin shong ryngkat bad u ha kata ka bym kut shuh.
KA JINGLONG LAI HA UWEI JONG U BLEI
Ka jinghikai tynrai jong ka Bible ka dei ka jinglong LAI HA UWEI jong u Blei. U Jisu Khrist U dei u bynta jong ka jinglong LAI HA UWEI jong U Blei. U Blei U kpa, U Blei u khun U Blei U Mynsiem Bakhuid bad ka pynshisha ïa ka jingdon U Blei.
Nuksa – Kaei kaei kaba don shisha (entity) ka kynthup ïa ki lai kiba don ha kata kaba don.Kita ki dei ki lai ki jingthew. Ka lynter, ka pynkiang, ka jingrben. (length, breath and height) kine ki lai ki pynlong ïa kaei kaei ba kan don shisha (entity). Kano kano ka bym don ki lai ha ka, KAM DON. Ka jinglong Lai U Blei ha Uwei ka pynshisha ïa ka jingdon shisha U Blei. Bad ka long ka jingpynshongñia kaba ym lah ban pynrem, namar ba ka long kaba shisha, ka dei ka aiñ jong ka mariang bad baroh kiei kiei ha ka Universe ki ïa long kumta.
Nga ai khublei Khristmas ïa phi ki nongpule ha ka kyrteng kaba khraw tam U Trai Jisu U Nongpynim jong ka pyrthei.
