Shillong, Nohprah 22
Ka Shillong Lajong FC kan pynkhreh ïa ka jingïakhun pyrshah ïa ka Namdhari FC ha ka lympung ïalehkai I-League ha ka sngi Saitjaiñ ha SSA Stadium Polo.
Ha kane ka jingïalehkai ha la ïing, ka Lajong ka donkam ban ïalehkai bha na ka bynta ban khur ïa ka jingjop hadien ba ka la mad ïa ka jingshah rem dangshen ha Srinagar ha ka Real Kashmir FC da 3-1 kol.
Hadien ki ar tylli ki jingshah rem ha kane ka lympung, ka Lajong ka la khur jingjop saw sien bad ïakhaid saw sien. Kane ka kynhun hapoh ka jingïalam u Bah Bobby L. Nongbet ka la hiar sha ka kyrdan ba hynriew bad kamai 16 point na ki 10 sien ïakhun.
Na ka liang u coach ka Lajong u Bah Bobby L. Nongbet u la pynpaw ïa ka jingkhmih lynti ba ka kynhun jong u kan ïalehkai bha ha kane ka jingïakhun pyrshah ïa ka Namdhari namar kane ka kynhun ka la lah ban pynliem ïa ka TRAU da 2-1 kol ha ka jingïalehkai ba la dep.
Ha kawei pat ka liang ka Namdhari ka la don ha ka kyrdan ba 11 bad kamai 8 point hadien ba ka la jop ar sien, ïakhaid ar sien bad shah rem haduh hynriew sien.
U Harpreet Singh uba dei u coach ka Namdhari u la pynpaw ba ka kynhun ka la ïai pynkhreh na ka bynta kane ka jingïakhun bad na ka liang ki nongïalehkai ki la trei shitom namar kane ka kynhun ka la khur jingjop ha ka jingïalehkai ba la lah.
Te kumta la khmih lynti ba kane ka jingïakhun kan long kaba kham itynnad namar baroh ar ki kynhun ki la khmih lynti ban khur ïa ki lai point khnang ba kin nanglah ban jam shaphrang.
Ha kaba ïadei bad kane ka jingïalehkai, ki bor pynïaid ka Shillong Lajong ki la pynbna ba ka jingdie ïa ki tiket lah ban ïoh na Electronic Centre (Police Bazaar), Cafe Shillong (Laitumkhrah) lane ki lah ban ïoh na SSA Stadium Ticket Counter.
