Ha kane ka aïom lehkmen, ka dheng kali ha Shillong ka la wan ban syrtap bad ka la nang ishyrkhei na uwei u snem sha uwei pat. Ka jingbun palat ki kali, ka jingïaknieh ban ïoh poi nyngkong watla ym don khusnam na ka bynta kita kiba wan nyngkong, ka jingduna ki jaka pynïeng kali bad ka jingbymlah ban thaw ïa ki surok thymmai ki dei ki jingeh kiba ngi shem bad ïohi na ka por sha ka por. Ki surok ki long kumjuh, ki kali ki la nang kharoi haduh ba la ishyrkhei khait. Ki kali ki la khapngiah ha ki surok shnong namar bym don jaka set. Man la ka sngi, da ki phew tylli ki kali thymmai ki mih na ki jaka die la kumba mih ki kber. Kane ka mat ka la poi shaduh ka Meghalaya High Court hadien ba u Bah Philip Khrawbok Shati u la mudui sha ka ïingbishar halor ka dheng kali ha kane ka nongbah khamtam ha ka thaiñ Kachari.
Ka sorkar kam len ba ka dheng kali ka dei ka jingeh khamtam ba kane ka jaka ka long lum bad ka jynjar ban pynmih ne shna surok thymmai. Nalorkata, ka la pynpaw ba kiba bun ki jaka ha Central Shillong ki dei ki jong ki shipai lane kita ki Defence Land. Ka long kaba jynjar ban ïoh ïa ki jaka shipai ban pynkylla sha ki jaka paidbah. Hynrei lada don ka mon, lah ban pynlong kam. Ngi la ïohi ïa ka jinglong kam ha ka jingpyrshang ban ïoh pyndonkam paidbah ïa ki jaka shipai. Kane ka dei ha ka por ba ka sorkar ba la ïalam da u (L) Bah E.K Mawlong ka la don ha ka bor. Hapdeng khyndiat bnai, kane ka sorkar ka la lah ban pynkohnguh ïa ki bor ha Delhi ban ai lem ki jaka shipai ban ïoh pyndonkam na ka bynta ka jingmyntoi ki paidbah. Ki sorkar kiba wan hadien ki la ïa pyrshang ban ïakren ha Delhi tangba ki dei ban kham pyneh ïa ki jingïakren khnang ba ka kam kan urlong.
Ngi kyrmen ba kan ym mih ka huri-hura namar ka jingdheng kali namar ha ka jingïabeh por, ka lah ban wanrah ïa ka jingbitar hapdeng ki nongleit nongwan. Tangba ngi dei ban kynmaw ba kane ka dei ka aïom jong ka jinglehkmen bad ym ban ïa wanrah ïa kino-kino ki jingsngewsih ha ka jingim jongno-jongno. Long kiba jai-jai bad adkar ha ka ïaid ka ïeng bad ka bam ka dih khnang ba kan ym don kano-kano ka saw ka sian. Ngi lah ban lehkmen ha ki rukom bapher-bapher tangba ym dei ban ïa kmen haduh ban ym lah shuh ban ïa pynïapher hapdeng ka jingbha bad jingsniew. Da ka jingjai-jai, ki jinglehkmen ki dei ban ïaid khnang ba kan long shisha kaba hun na ka bynta baroh.
Na ka liang ki bor pulit ki dei ban pyrkhing bha ban peitngor ïa ka rukom ñiah kali ha kine ki sngi khamtam eh ha ka por mynmiet. Ki pulit ki la dep ban ai lypa ïa ka jingmaham. Ka tnat Shillong Traffic Police (STP) ka la pyntip ba kan pynlong da ka jingtalasi kali ha kylleng ki bynta jong ka nongbah Shillong na ka bynta ban tehlakam ïa ka jingñiah kali khlem akor bad hapdeng ka jingbuaid kyiad ban pynthikna ban lait na ki jingjia ba sngewsih. Ka jingtalasi kali jong ki pulit kan long ha kylleng ki jaka ba kynthup ha ki surok By-pass, surokbah (highways) bad ki surok shnong bad lada lap ïa kino-kino kiba ñiah kali bad ka buaid palat (30 mg. per 100 ml. ha ka snam) kin shah pynshitom hapoh ka kyndon Section 185 MV bad ka jingshah daiñ kuna T.10,000 lane shah set along haduh 6 bnai lane ka jingpynsaja kan long baroh ar.
Ngi kyntu biang ïa ki para nongshong shnong ba kin long kiba adkar ha kine ki sngi khnang ba kan ym don ka jingjia ba sngewsih. Ki shnong ki thaw ruh ki dei ban ïa peitngor ïa ki paidbah khnang ban lait na ki kam be-aiñ namar ha ka jingshongshit bad jingkmen, kin don ki ban leh ïa ki kam kiba lah ban pynblad noh ïa ka jinglehkmen. Baroh ngin hap ban shim ïa ka jingkitkhlieh ban pynthikna ba ka jingrakhe ïa ka Khristmas bad Snem Thymmai kan long kaba ïaid beit ïaid ryntih bad kaba lait na ki kam sngewsih.
