Prague, Nohprah:
Ha kane khubor la ong ba uwei u briew u la shim ia ka jingim jong 15 ngut ki briew bad u la pynmynsaw ruh ia bun ngut ha ka skulbah Prague University ha ka Sngi Palei. Kane ka la jia ha Czech Republic, ha kaba utei u briew u la siat iap shwa ia la u kpa ha shwa ba un leit ban synreit kuli naphang ia kiwei pat kiba don ha katei ka jaka pule.
Katei ka jingjia ka long kaba shyrkhei tam ha katei ka nongbah ba kan ioh mad ha kum kane ka por. Na ka liang ki bor pyniaid ki la phah da ki bor pahara ban leit tehlakam ia katei ka jingjia bad la maham ruh ia ki paidbah nongshong shnong ba ki dei ban setkut ialade hapoh ïing namar ka jingma kaba ap na katei ka jingjia.
Katei ka jingjia ka la jia hapoh ka tnat Faculty of Arts jong katei ka skulbah Charles University, kaba don hajan ki thaiñ ba ju leit bha ki ‘riew shangkai pyrthei kum ka jingkieng Charles Bridge kaba la don 14 snem mynta.
Ha katei ka jingjia, la ong ruh ba 15 ngut ki briew ki la duh noh ia ka jingim bad kumba 25 ngut pat ki la mynsaw.
Napdeng kitei kiba mynsaw baroh, 9 ngut ki dei kiba mynsaw jur bad ka jingim jong ki ka don ha tmier ka jingïap. Katba 5 ngut pat ki dei kiba la mynsaw jur hynrei kiba dang lah ban lait na ka jingma bad 11 ngut pat ki dei kiba shu mynsaw malu-mala bad ki bym da shah ktah jur than eh.
La ong ba ki pulit jong katei ka nongbah ha katei ka sngi, ki la leit ban buddien bad thwet ia utei u runar uba la dep siat iap shuwa ia u kpa lade ha ka shnong Hostoun West jong ka Prague.
Nalor nangta ka khubor ka iathuh ruh ba utei u runar u don jingthmu ruh ban shim noh ia ka jingim lade, bad kumta u la leit ban leh kput bad synreit kuli dusmon shuwa ia kitei kiba don ha katei ka jaka pule kat kiba don baroh.
Tat haduh jong ka step Sngi Thohdieng, ki pulit ki la ialeh ban thwet ia utei u runar ha kylleng jong katei ka thaiñ ba don katei ka skulbah hynrei la ong ba kim shym lap ksai eiei satia shaphang jong u.
Ki heh ka tnat pulit jong katei ka nongbah, ki la iathuh ba ha katei ka jingjia ym shym la don ki pulit kiba ngat ne mynsaw hynrei ki pulit ki dang ialeh ban buddien bad ban thwet ia utei u runar uba la shim ia ka jingim jong bun ngut ki briew ha shwa ba un jah rngai noh syndon ha katei kajuh sngi.
Kumta na ka liang ki pulit ki la pynkynriah noh ia baroh ki lanot kiba don ha katei ka jaka naduh ba sakhi ia katei ka jingjia kaba shyrkhei bad kaba la pynpar ñiang khriat lut ia ki paidbah kiba don ha katei ka jaka bad ia ki nongshong shnong jong katei ka thaiñ baroh kawei.
La ong ruh ba katei ka jingjia synreit kuli ha kane ka sien, ka long kaba shyrkhei tam hapoh Czech Republic naduh ba katei ka ri ka la ioh ia ka jinglaitluid ha u snem 1993.
U President ka Czech Republic, u Petr Pavel u la pynpaw ia ka jingsngewkhia kaba jur haba iadei bad katei ka jingjia bad kumjuh ruh halor ka jingbym lah jong ki bor pyniaid bad ki bor pulit ban tehlakam ia katei ka jingjia ha ka por kaba biang. Kumta ruh u Pavel u la phah ia ka khubor sngewlem sha ki iing jong kito kiba khlad bad mynsaw baroh bad kular ba ka sorkar kan ialeh katba lah ban ai jingkyrshan bad ban iarap ia ki jingdonkam jong kitei ki longiing ha kum kane ka por ba ki ia kynduh jingeh. Ha kajuh ka por ruh u Pavel u la ong ba ki bor pyniaid kin leh ia kaba donkam baroh bad kin nym pyllait ia utei u runar uba don kti ha katei ka kam thombor pyrshah ia ki riew paidbah ba lui-lui kiba don ha katei ka jaka ha katei ka sngi.
