New Delhi, Nohprah:
U Myntri jong ka tnat pule-puthi jong ka sorkar kmie u Dharmendra Pradhan u la pyntip hapoh Rajya Sabha ha ka Sngi Balang ba ka sorkar hapoh ka jingïalam jong u Modi ka la lah ban kyntiew ha kaba ïadei bad ka jingpynrung kyrteng ïa ki khynnah kynthei ha ki skul da 31% naduh u snem 2014-15.
U la ong, “Ka jingkiew ha kaba ïadei bad ka jingpynrung kyrteng jong ki khynnah skul kynthei kiba shah kynthup ha ka SC bad ST ka la long 44% bad 65%.”
Ka jingdon jong ki khynnah kynthei kiba dei ki riewlum kiba la pynrung kyrteng ha ki skul ka la long 80% kaba la kiew bha hapoh ka jingïalam jong kane ka sorkar.
Ka sorkar kmie ka la ïaleh ban wanrah kine ki jingkylla khnang ban pyntreikam ïa ka National Education Policy, ha kaba da kane la lah ban kyntiew da 25-26% ka jingdon jong ki khynnah kiba pynrung kyrteng ha ki skul.
Ka India ïa mynta ka la don 30 klur ngut ki khynnah pule, ha kaba 26 klur ki dei kiba pule ha ka klas 1 haduh 12 bad 4 klur ha ki kyrdan pule kiba kham shalor.
Ka sorkar kmie ka la pynpaw ba ka don ka jingkyrmen ba ka National Education Policy kan sa nohsynñiang na ka bynta ban kyntiew ïa ka ri ha baroh ki liang ha u snem 2047.
Katkum ka jingong jong ka sorkar kmie, la ong ba ka Central Board of Secondary Education (CBSE) ka la ong ba ïa ki jingdonkam na ka bynta ki jinghikai bad ki jingnang ban kren bad sngewthuh ïa 20 tylli ki jait ktien bapher bapher ha ka ri yn sa pynïoh ha ki skul.
