Bhubaneswar, Nohprah:
Ki la don baroh kumba 4,166 ngut ki nonghikai kiba la shahjied ban trei ha ki skul sorkar kiba don ha Odisha ha ka sngi Balang ha ka por ba la don ka prokram pdiang burom ïa ki ha Kalinga Stadium ha Bhubaneswar.
“Ka thong jong ki nonghikai ym tang ba kin pynbha ïa ki khynnah, hynrei ban pynbha ruh ïa ka jingim briew, ka kam nonghikai kam dei tang ka lad kamai, hynrei ka kam ka ban pynkhreh ïa ka Odisha na ka bynta ka lawei,” la ong u Myntri Rangbah jong ka jylla u Naveen Patnaik ha ka por ba u la ai jingkren ha kane ka sngi.
U Patnaik u la ong ba ki la don kumba 6,883 tylli ki High School ha kylleng ki jaka jong ka jylla ïa kiba la shah pynkylla haduh mynta hapoh ka Flagship 5T jong ka jylla (ka jingpyntreikam kaba wanrah ka jingpynkylla.
“Kane ka la wanrah ïa ka jingkylla bak-ly-bak ha kaba ïadei bad ki bynta jong ki sawdong-sawkun jong ka skul,” u la ong.
U Patnaik u la ong shuh shuh ba ka Odisha ka la dep ban pyllait ïa T. 138 klur ka pisa na ka skhim ‘Chief Minister’s Education Award’.
Ïa kine ki khusnam yn sa sam sha ki nonghikai, ki khynnah skul, ki skul sorkar, ki nongpynïaid shnong ha ki Panchayat, ki kynhun nongpynïaid skul, ki heh ba dei khmih jong ki jaka pule ha ki distrik bad ki block, u la bynrap shuh shuh.
