Shillong, Nohprah 22
Ka Nongthymmai Cultural and Sports Club Huroi ha ka Sngi Palei ka la plie paidbah ïa u mot sahnam jong ki nongseng jong katei ka klob ha madan ïalehkai jong ka Nongthymmai Cultural Sport Club.
Ha kane ka sngi la wan sakhi lang da ka M.L.A ka 5 Sutnga Saipung Constituency ka Kong Santa Mary Shylla kaba la long ruh kum ka kongsan ha ka jingdonlang ruh ki nongïalam shnong naduh u Rangbah shnong jong ka shnong Huroi Bah Golden Marbaniang, u secretary ka shnong Bah Raja L. Suchen, ki ‘riew pawkhmat jong ka thaiñ kum u Bah Daya Lamare, ki nongïalam kane ka klob, ki ‘riew rangbah, ki samla jong ka shnong Huroi bad kiwei kiwei.
Hashwa ban pynlong ïa kane ka prokram ka la don ka sports meet kaba ar sngi kaba la pynlong da kane ka klob kiba kynthup ïa ki jingïakop mareh, long jump bad kumta ter ter ha kaba la wan shim bynta shitrhem da ki ki ‘riew rangbah kynthei bad shynrang, ki samla, ki khynnah.
Ha katei ka sngi ka la don ruh ka jingïalehkai phutbol paralok ba la ïakhun da ka Hingaria SC bad ka Youngstar Sport Club, Huroi. Ïa ka nam jop la khur da ka Youngster Sport Club kaba la ïoh ban pynkhih jar shi kol.
Haba phai sha kane ka prokram jong ka jingplie paitbah jong ka klob ïa une u mot sah jingkynmaw jong ki nongseng ïa kane ka klob, ka M.L.A ka Kong Santa Mary Shylla ka la kyntu kynpham ïa ki nongkitkam jong kane ka klob ba kin nanglah shuh trei ban trei shitom ïa ka jingbha jingmiat ka shnong ka thaw bad ka imlang sahlang, ka la ong ruh ba kan ïatrei ryngkat ryngkat lang bad ki paitbah bad ki nongïalam kong ka shnong ban warah ïa ka jingkylla ha kaba ïa dei bad ka shnong bad kumjuh ruh bad kane ka klob.
Ka la ong ruh ba kum ka sub-center kaba don hapoh ka shnong kan ïaid lynti ban buddien khnang ban ïoh pynkiew noh sha ka PHC ïa kane ka jaka ai sumar, kum ka surok Sunapur shaduh Huroi, ka ïew border hat, kan trei shitom ban buddien ba kin ïoh ban pyndep noh khnang ba ki paidbah kane ka shnong kin khamsuk. Kan ïarap ruh kat ha i buit i bor jong ka ban wanrah ïa kaei kaba bha tam ha kaba ïa dei bad kane ka klob.
Shuh shuh la ïoh ka jingkren na u Rangbah shnong Bah Golden Marbaniang uba la ïathuh ba kane ka Nongthymmai Cultural and Sports Club Huroi ka dei kawei na ki klob kiba don hapoh ka shnong kiba kham kiew ha ka liang ka jingïalehkai sport. U la ong ruh ba kane klob ka donkam ba kan don ka madan ïalehkai kaba biang kum ka Mini-Gallery bad khamtam ka kynroh ban kynroh ïa kane ka madan na baroh ki bynta kiba sharud jong ka namar ka dei ka madan kaba ym tangba ki jingïalehkai phutbol, hynrei ha kane ka madan la pyndonkam ïa baroh ki prokram kiba kham heh ruh, kum ki jingïaseng heh, ki prokram sorkar, ki jingïalehkai phutbol kiba heh bad kumta ter ter.
U la ai khublei kyrpang eh ruh ïa ki nongïalam kane ka klob kiba la kiba la trei borbah ha kaba ïadei bad kane ka klob. Ka kane ka sngi, ka klob ka la pynkup burom ruh ïa ki nongtreimon sngewbha kiba don hapoh ka shnong Huroi, ïa ki nongïashim bynta ha ki jingïalehkai bapher bapher, kumjuh ruh ïa ki khynnah pule kiba don hapoh kane ka shnong. La pynïaid ïa kane ka prokram da u president ka klob u Bah A.L Khongshei.
