Ranchi, Nohprah:
Ki dkhot jong ka kynhun lehnoh CPI (Maoist) ki la pynbthei ïa ki bynta jong ka lynti rel ha West Singhbhum distrik jong ka Jharkhand. Kane ka la ktah jur ïa ka jingtreikam jong ki rel kiba dei ïaid na ka lynti rel Howrah-Mumbai, la ïathuh ki pulit hynnin ka sngi.
Kane ka jingjia ka la jia ha ka por shiteng synñia jong ka sngi Palei ba ka sngi Thohdieng hapdeng ki jaka sangeh rel jong ka Goilkera bad ka Posoita, ka jaka kaba jngai da kumba 150 km na ka nongbah Ranchi, la ïathuh u Superintendent of Police jong ka West Singhbhum u Ashutosh Sekhar.
“La pynkhlaiñ ïa ki bor pahara ha kane ka thaiñ. La sdang ban pyntreikam na ka bynta ka jingpynbha ïa ki bynta ba la shah pynjulor na ka jingbthei bom ha ka lynti rel naduh ka step jong ka sngi Thohdieng kata hynnin ka sngi bad ym slem hadien ba la dep ban pynbha, ka jingtreikam jong ki rel kan sa sdang biang,” u la ong, ha kaba u la bynrap shuh shuh da kaba ong ba ki lehnoh Maoist ki la buh ruh da ki lama bad ki kot kiba don ïa ki jingthoh ba pyrshah ba la tah ha kylleng ki jaka jong ka thaiñ.
Kumba la ïoh jingtip, la ong ba kane ka kynhun lehnoh, ka la pynlong ïa ka taïew jong ka jingïakhih kaba la sdang naduh ka 16 tarik, Nohprah bad khot pakhang shnong ruh na ka bynta ka Bharat Bandh hynnin ka sngi.
