Agartala, Nohprah:
Ki shipai ïada khappud ha ryngkat ka jingïatreilang jong ki pulit, ki la pynlong ïa ka jingpahara bad ka jingpyntreikam pyrkhing ha ki bynta khappud kum shi bynta ban khanglad ïa ka jingwan rungtuh jong ki bar ri ne ki lehnoh sha ki bynta jong ka ri.
Kane ka jingpyntreikam jong ki shipai ka la long khyndiat sngi hadien ba arngut ki heh nongïalam jong ka National Liberation Front of Tripura (NLFT) kynthup uwei uba la shah hikai pyntbit ha ka kynhun syntiat jong ka Pakistan ki la shahkem ha Tripura, ki la don shuh sa arngut ki dkhot ba snar jong ka kynhun bad uwei u nongbud jong ki ki la shahkem hashwa kata ha ka sngi Saitjaiñ ym slem hadien ba ki la phet na ka jaka rieh tngen kaba don ha Bangladesh, la ïathuh ki heh pulit.
Ki pulit ki la ïathuh shuh shuh ba hadien ka jingïoh jingtip ba la phah da ka Special Branch, ki pulit jong ka North Tripura distrik bad ka Tripura State Rifles (TSR) ki la pynlong ïa ka jingleit khynra ha ka step jong ka sngi Saitjaiñ bad ïohkem ïa kine ki lehnoh hajan Bhandarima kaba don ha khappud India-Bangladesh.
Ki lehnoh ka kynhun NLFT kiba kynthup ïa u Ganaram Reang bad u Raibahadur Reang ki la ïaid lyngba ka khappud India-Bangladesh hadien ba ki la phet rieh na ka jaka rieh tngen jong ki kaba don ha Jupui ha Bangladesh bad leit ban pan jaka sah ha ka ïing jong uwei u briew ba la tip kyrteng kum u Railanhya Reang.
La ïoh ban kurup ïa kawei ka pistol ba la shna ha China, katto katne ki jingthoh jong ka kynhun NLFT, kiba bun kiwei pat ki kot donkam, bad ka pisa kaba bun kaba dei ka pisa India bad Bangladesh na kine ki lehnoh.
Ki pulit ki la ïathuh ba arngut ki nongïalam jong ka kynhun NLFT kiba kynthup ïa u Sachin Debbarma bad u Uppal Debbarma ki la shahkem ha ka miet jong ka sngi Palei ha Simna kaba don ha ka bynta ba shaphang Sepngi jong ka Tripura ym slem hadien ba kine ki arngut ki la rung ha ka jylla na Bangladesh lyngba ka jingprong lynti na kyndong-kynshrot.
“U Sachin u la don ha Pakistan bad u la ïoh jinghikai pyntbit na ka kynhun syntiat jong ka Pakistan hashwa ba un leit sha Bangladesh,” la ïathuh u heh pulit, u bym shym kwah ban pynpaw kyrteng.
U heh pulit u la ïathuh ba kine ki nongïalam pyrshah sorkar ki la shah pyllait na patok kaba ha Bangladesh ha ki khyndiat sngi ba la leit hadien ba ki la shah set da bun bun snem.
Ha Bangladesh, kine ki lehnoh ki la don bynta ban leh ïa ki kam pyntriem ha Tripura da bun bun snem hashwa ba kin shahkem ha ki pulit jong ka Bangladesh.
