Imphal, Nohprah:
U Myntri Rangbah jong ka Manipur u N Biren Singh u la ong ba ka jylla ka dang trei shitom na ka bynta ban khanglad ïa ki samla ba kin kyrni ha ka jingdih drok bad ha ka kam khaïi drok ha kaba la wanrah da ka jingkhmih bniah ha kylleng ki jaka.
Ha ka jingïakren bad ki nongthoh khubor, u Singh u la ong ba wat la ka Manipur ka dei ka jylla kaba rit, ka jingdon jong ki nongpyndonkam ïa u drok ka la nang kiew katba nang mih ki sngi.
“Ka sorkar jylla ka la ïakhun tyngeh pyrshah ïa u drok ha u snem 2019 bad naduh une u snem ka la ïai bteng ha ka ban pynduh bad pynjulor ïa ki syntiew Poppy ba la thung ha ki lyngkha ne ki kper bad kem ruh ïa ki spah ngut ki nongkhaïi drok,” u la bynrap.
“Ka Manipur ka la khanglad ïa ki samla kiba na India ha kaba ïadei bad ka jingpynpoi ïa u drok sha kiwei pat ki bynta jong ka ri na Myanmar bad kiwei pat. Ka Manipur ka la trei shitom na ka bynta ban khanglad ruh ïa ka jingpynpoi ïa u drok sha kiwei pat ki bynta jong ka jylla,” u la ong.
Ha ka jingai jingkren ha ka jingïalang, u Singh u la ong, “Ka jylla ka la ïaid lyngba ki jingeh kiba bun, hynrei da ka jingkyrshan jong kiba bun balang la lah ban khie khlieh ha ka ban ïakhun tyngeh halor u drok.” “U Myntri Rangbahduh u Narendra Modi u la buh hakhmat eh ïa ka Manipur bad kwah ban kyntiew ïa kane ka jylla ha kiba bun ki liang,” la ong u Singh. Na ka jingdon jong ka jingkhmih bniah kaba dang ïai bteng ki shipai ïada ri ki la lah ban pynjulor ïa ki syntiew Poppy ba la thung ha 27 akar ka jaka ha ka shnong Makui bad Langka kiba don ha Kangpokpi distrik jong ka Manipur hapdeng ka sngi Palei bad ka sngi Saitjaiñ jong ka taïew ba la lah, la ïathuh ki pulit.
Ki Poppy kiba la shah pynjulor ki la long ha 15 akar ha ka shnong Makui bad 12 akar la pynjulor ha ka shnong Langka, ki la bynrap.
“Ka kynhun kaba la ïatreilang bad ki shipai ïada ri ki la pynlong ïa ka jingleit khynra bad pynjulor ïa u Poppy ha ka shnong Makui bad Langka, kiba don ha Kangpokpi distrik, hapdeng ka 14 tarik, bad ka 16 tarik, Nohprah, 2023. Ha ka por ba la pynlong ïa ka jingpyntreikam, la ïoh ban pynjulor ïa u Poppy ba la thung beaiñ ha 15 akar ha ka shnong Makui bad 12 akar ha ka shnong Langka,” la ong ki pulit jong ka Manipur ha ka jingphah khubor ha ka rynsan ‘X’.
Ha basdang jong u bnai Kyllalyngkot jong une u snem, ki pulit jong ka Manipur, ha ka jingïatreilang bad ka Forest Department bad ki shipai ka tnat Assam Rifles, ki la ïoh ban pynjulor ïa 80 hajar ki syntiew Poppy ba la thung ha ka jaka kaba heh da 1.25 akar ha ka shnong Longpi kaba hap hapoh ka jingkhmih jong ka Nungba Sub-Division hapoh ka Noney distrik jong ka Manipur.
Ka dor jong u Poppy uba la shah pynjulor kumba la antad ka la long da T. 10 lak, la ong ki shipai ka tnat Assam Rifles ha ka jingthoh ba ki la phah, ha kaba la bynrap shuh shuh da kaba ong ba kane ka jingpyntreikam ka long shi bynta ban ïakhun pyrshah ïa u drok.
