Tulkarm, Nohprah:
Ka tnat ka koit ka khiah jong ka Palestine ha ka Sngi Balang ka la iathuh ba 6 ngut ki nong Palestine ki la duh ei noh ia ka jingim hadien ka jingleit thombor jong kawei ka drone jong ka Israel ha ka nongbah West Bank jong ka phang Tulkarm ha katei ka jingjia.
Kumjuh ruh na ka liang ka tnat shipai jong ka Israel, ka la iathuh ba ka tnat shipai Israel ka la ioh ban tehlakam ia ki lehnoh kiba leit ban kawang bom sha ka kynhun shipai hapdeng ka jingleit khynra jongki ha katei ka thaiñ. Kumta ruh la ong ba ki shipai Israel ki la pyndonkam da katei ka liengsuiñ rit kaba ju tip kum ka ‘Drone’ bad kaba la ioh ban ther bom bad pynliem ia kitei ki lehnoh kiba don ha katei ka jaka ha katei ka sngi.
Kane ka la jia ha ka thaiñ Nour Shams, kaba la ong ka thaiñ ba shong ki phetwir ha Tulkarm.
