Agartala, Nohprah:
U ‘riew saiñ pyrthei ba pawkhmat bad u nongïalam jong ka seng BJP u Surajit Datta, uba la long MLA la kumba hynñiew sien u la khlad noh.
Une u ‘riew saiñ pyrthei ba pawkhmat u la shahjied sha ka Ramnagar Assembly Constituency la hynñiew sien ha ki samoi treikam jong u. Une u nongïalam u la ïoh ïa ki kyrdan ba bun kum u dkhot jong ka Legislative Assembly na ka bynta hynñiew snem, bad u la khlad noh ha ka miet jong ka sngi Balang.
U Surajit Datta uba long u MLA jong ka seng BJP, u la shah ktah na ka jingshitom ha kaba u la ïoh ïa ka jingpang jong ka jingthut treikam ki khyllai, u la shah ktah ruh ha ka High Blood Sugar bad Pressure.
Kane ka jingshah ktah jong u ha ka jingpang ka la pynlong ïa u ban shah leh Dialysis da kumba katto katne snem. Hadien ba u la shah ktah jur ha ka jingpang, ïa u Datta la pynkit mar mar sha ka jaka ai jingsumar kaba ha Agartala.
Namar ka jingjur palat ka jingshitom, la pynkynriah noh ïa u sha AMRI Kolkata ha ka sngi Balang shiteng sngi. Kumjuh ha ka por 11:30 da miet, u la khlad noh hapdeng ka jingshah sumar. Ha ka por ba u dang shah sumar ha ka jaka ai jingsumar ha Agartala, u Myntri Rangbah ka jylla u Dr Manik Saha, ka Myntri ka sorkar kmie ka Pratima Bhowmik, bad u nongïalam ka liang pyrshah u Animesh Debbarma ki la leit jngoh ïa u ha kaba ki la pynpaw ka jingsngewlem naba ka jingshitom jong u ka la nang jur.
