Brussels, Nohprah:
U Jacques Delors, uba long u heh nongialam barim jong ka EU Commision bad uba long ruh u kongsan ha ka jing wanrah ia ka pisa ‘Euro’, u la khlad noh ha kane ka kynti, ha ka rta ba 98 snem hapdeng ka jing iohthiah lyngngai hapoh ka iingsah jong u ha Paris ha ka Sngi Balang, la iathuh ka khun jong utei u nongialam ha katei hi ka Sngi Balang.
U Delors, u long u nongialam uba la shem phang bha ha ka saiñ hima- sima bad uba la trei ruh la bun snem hapoh France, ha kaba u la long u Myntri jong ka tnat pla- tyngka hapoh ka jingialam jong u President Francois Mitterrand naduh ki snem 1981 haduh 1984.
Hynrei la ong ba um shym la kwah shuh pat ban iakhun naka bynta ka shuki President ha ki snem 1995 wat haba u don shibun bah ki nongkyrshan kiba lah ban pynjop suk ia u ha katei ka por.
Kumta u la ioh pat ban long u heh nongialam jong ka European Commision naduh u snem 1985 haduh u snem 1995, kumba 10 snem lynter bad u la long ruh u kongsan ha kiba bun tylli ki kam ba la lah ban pyndep bad wanrah da katei ka tnat ha kitei ki por ka jingialam jong u.
