Aizawl, Nohprah:
Ha ki jingpyntreikam ba bun ha baroh shi snem, ki shipai ka tnat Assam Rifles ki la ïoh ban kurup ïa ki jingdih pynbuaid kiba la kot sha ka T. 956.65 klur kumba ka la long ha ka 25 tarik, Nohprah, 2023.
Kumba la ïathuh ka tyllong khubor ba dang shen kaba la wan na ki heh ka tnat Assam Rifles, ki la don baroh kumba 248 tylli ki jingpyntreikam ïa kiba la pynlong ha u snem 2023, ha kaba na kine ki jingpyntreikam la ïoh ban kurup ïa kiba bun ki jingdih pynbuaid.
Ki jingdih pynbuaid ba la ïoh ban kurup ki kynthup ïa 33.20 kilo u Heroin No. 4 uba la kot sha ka T. 546,62,99,200, 3 kilo u Opium uba la kot sha ka T. 1,80,000, bad 20.540 kilo u symbai Poppy ha kaba la antad ba u la kot sha ka T. 53,04,000.
Shuh shuh la ïathuh ba u Marijuana, uba la don baroh 25,950 kilo bad uba la kot sha ka T. 18,48,900, la ïoh ban kurup. Ki shipai Assam Rifles ki la ïoh ruh ban kurup ïa ki dawai Methamphetamine Tablets uba la don da 12,17,524 tylli ha kaba u la kot sha ka T. 339,36,61,800, ha ryngkat 98,000 ki dawai Tripolidine Tablets kiba la kot sha ka T. 9,80,00,000.
Ha baroh, ki jingdih pynbuaid ba la ïoh ban kurup kumba la kheiñ kyllum ki la kot sha ka T. 956.65 klur. Nalor kine ki jingdih pynbuaid, la ïoh ruh ban kurup shuh shuh sa kiwei pat ki song kiba kynthup ïa 681.03 Quintals u Areca nut, uba la kot sha ka T. 47,31,05,500, 4,134 song ki sikret bar ri kiba la kot sha ka T. 47,79,50,315, bad 2,953 song ka kyiad ha kaba la antad ba ka la kot sha ka T. 1,26,77,416. Ka dor jong kine baroh kumba la ïoh ban kurup kumba la antad ki la kot sha ka T. 96.07 klur.
