Nongstoiñ, Nohprah 28
Ka hat-trick ba la ïoh da u Shano Tariang ka la biang pura ïa ka Shillong Lajong FC ban jam sha ka quarter final jong ka lympung ïalehkai Invitation Knockout Football Tournament 2023-24 ba la pynïaiad da ka New Nongstoiñ Sports Social & Cultural Club.
Kane ka jinglah ban pynthikna ka la wan urlong hadien ba ka la lah ban pynliem noh da 4-1 kol ïa ka AFC Manipur ha ka pre-quarter final kaba la long ha ka sngi Palei ha madan New Nongstoiñ.
Ha katei ka jingïalehkai ka AFC Manipur kaba la ïoh ïa ka kol kaba nyngkong hadien uwei na ki rangïalehkai ka Shillong Lajong u Atlanson u la kum bakla thep hi ha ka minit kaba 13.
Hynrei hadien shiteng kynta ka Shillong Lajong ka la lah ban pynphai kylla lyngba u Shano ha ka minit kaba 34. Une u rangïalehkai shakhmat u la thep biang sa ar kol ha ka minit kaba 46 & 86 na ka bynta ban khur ïa ka hat-trick. Ïa kawei pat la thep da u Riman ha ka minit kaba 55. Ïa ka nam Man of the Match la ïoh ban khur da u Shano Tariang.
Na ka liang ka NNSSCC, ka la pyntip ba ka jingïalehkai kaba khaduh jong ka pre-quarter final kan long ha ka 5 tarik u Kyllalyngkot 2024 hapdeng ka Kith United pyrshah ïa ka Nangkiew Irat SC.
