U Nongsaiñ Hima, 1981
U Paid Khasi naduh Rilang haduh Kupli u dei u Jaidbynriew uba rit paid. Baroh ngin don tang kumba 41/2 lak briew. Kumba ju long, ki briew kiba shong ha ki ri lum ki long kiba duna shibun ha ka jingbun briew wat ha la shi ïing shi ïing. Ym tip kaei ka daw hynrei haba shu mut dur kai ka lah ban long ka jingkhriat, ka rukom bam, ka rukom trei bad ka lah ruh ban long ka jingbym nang ban sumar ialade ne ïa ki khyllung jong ngi. Haba ïa pyrshang bad ki jaka sha ri thor lah ban ong ba tang shi ïing shi ïing phin lap da ki phew ngut.
Dei na kane ka daw ba ki riewstad ki la ong ba ka jing-roi briew sha thor ka long 4 shah ne 5 shah hynrei ka jingpynmih ïa ka bam pat ka dang duna man la ka snem. La don ka jingsheptieng ba kan poi ka por ba ka bam kaba la pynmih ha ri thor kan ym biang shuh ban pyndap ïa ki briew kiba don ha ka. La mih ka jingwad lad kumno ban pynduna ïa ki briew khnang ba ka bam kan biang ne khnang, hana ba ki kmie ki kpa kin lah ban pynshong skul bha ïa la ki khun haba duna ki khun.
Ka jingkylli kaba mih ka long la ma ngi kiba rit paid rit ngi dei ban shim ïa kita ki lad ban pynduna briew. Kane ka long ka jingkylli kaba mih bad ka jubab ka long ngim dei kiba heh paid bad ka jaka kaba dang bun kyrhai bad kaba biang bad dei namar kata dei ban pyrshang bad kaba biang bad dei namar kata dei ban pyrshang ba ka Jaidbynriew jong ngi kan ïar hynrei ym ba kan rit kan riad bad duh noh.
Ha ka juk synshar paidbah kum ha Ri India la kheiñ bad la thew tarajur da ka jingbun paid ban ioh ïa ki nongmihkhmat.
Ka Sorkar West Germary ka ai bai bam ia kito ki ïing ki sem kiba ka jingioh jong ki ka long kaba rit bad lada kita ki ïing ki sem ki don khun 5 ngut ne palat. Katba nang bun khun katta ruh ka bai bam ka nangheh. La ong ba shisnem shisnem ka jinglut ka sorkar ha kane ka liang kan poi sha ki phew klur tyngka. Ka West Germany kam dei ka Ri kaba rit hynrei ka dei ka Ri kaba bun paid bha. Hangne ka shong ka jingstad jong kane ka Ri, ka sngewthuh ba wei haba duna briew kata ka Ri kan duna shibun ki nongtrei, ki nongïada, ki nongkit nongbah ïa ka Ri bad ka jaidbynriew.
Hato kam la dei ka por ïa ka Sorkar ba kan lah kumjuh ïa kine ki Ri lum jong ngi ban pynshlur ïa ka jingbun ki khun ki khynnah hynrei ym ban pynduna ïa ki da ki lad stad ba mynta.
