New Delhi, Nohprah:
Ki la don kumba 134 tylli ki liengsuiñ bad 22 tylli ki rel kiba la sangeh treikam hadien ba ka la don ka jingkahdum jong u lyoh khyndew ha Delhi khamtam ha ki bynta ba shaphang Shatei jong ka ri kumba ka India Meteorological Department (IMD) ka la ïathuh lypa ba kan sa don ka jingkahdum jong u lyoh ha ki bynta jong ka Delhi, Uttar Pradesh, Haryana bad Punjab haduh ka 31 tarik, Nohprah.
Kumba la sakhi, la ong ba la ïohi ïa ki nongleit jingleit ba ki la ïeng laiñ ha phalor jong ka Indira Gandhi International Airport hapdeng kane ka jingkahdum jong u lyoh. Kane ka jingkahdum ka la buh jingeh haba ïaid lynti.
Kumba la antad, la ong ba ki la don kumba 134 tylli ki liengsuiñ, ha kaba ki la long na baroh arliang, kiba wan bad kiba leit, kynthup kiba napoh ka ri bad kiba nabar ri, kiba la shah ktah ha ka jingkahdum jong u lyoh.
Ki la don kumba 35 tylli ki liengsuiñ bar ri kiba dei ban mih bad 28 tylli ki liengsuiñ bar ri kiba dei ban wan poi kiba la sangeh treikam ha ka jaka sangeh liengsuiñ.
Ha kawei pat ka liang, ki la don kumba 43 tylli ki liengsuiñ ba hapoh ri kiba la dei ban mih bad 28 tylli kiba dei ban wan poi ha ka jaka sangeh liengsuiñ ki la shah ktah.
Ki la don kumba 22 tylli ki rel kiba la sangeh treikam da bun kynta ha New Delhi Railway Station ha ka por ba jur ka jingkahdum jong u lyoh.
Ha ka por 5.30 mynstep, ka jinglah ban ïohi lyngba ha Safdarjung kaba don ha Delhi ka la long haduh 50 metres katba ha Palam, hajan ka jaka sangeh liengsuiñ ha Delhi la ïoh jingtip ba ka la long tang 25 metres ka jingïohi lyngba.
Ha Punjab, Haryana, Madhya Pradesh bad UP, la lah ban ïohi ha ka jingjngai kaba naduh 50 haduh 25 metres.
Wat lada ka jingkahdum jong u lyoh ka la kham duna ha ki katto katne ki bynta hynnin ka step, ka jingkahdum jong u lyoh ka la jur bha ha ka thaiñ NCR.
Ki skul ha kiba bun ki nongbah jong ka UP ki la pynbna shuti namar ka jingjur palat ka jingkhriat kaba la bteng ha kiba bun ki bynta jong ka North India.
Ka Met ka la dep ban ïathuh lypa halor ka jingkahdum jong u lyoh ha ka por mynmiet bad ha ki kynta ha ki por mynstep haduh ka peit miet New Year ha ki jylla kiba don ha ka bynta ba shaphang Shatei.
