New Delhi, Nohprah:
Ka kynhun Enforcement Directorate (ED) ka la pyntip ba ka la buh jingmudui ïa ka nongïalam jong ka seng Congress ka Priyanka Gandhi ha kaba ïadei bad ka mukotduma hapoh ka PMLA ha kaba ka la pynpaw ïa ka kyrteng jong ka ba ka la thied ïa ka jaka rep kaba don ka jingheh kaba 40 kanal (san akar) ha Faridabad kaba don ha Haryana na u HL Pahwa u heh spah bad u Agent ha Delhi ha u snem 2006 bad die ïa kane ka jaka sha u ha u Rymphang, 2010.
Kumba la ïathuh ka kynhun ED, la ong ba kane ka jaka ba la thied ka don ha ka shnong Amipur kaba don ha Faridabad na u Pahwa u Agent ha kaba u kurim jong ka Priyanka Gandhi u Robert Vadra ruh u la thied ïa lai tylli ki jaka kiba don ha ka jingheh kaba 334 kanals (40.08 akar) ha ka shnong Amipur naduh u snem 2005-2006 bad die ïa ki sha u ha u Nohprah, 2010, la ïathuh ka tyllong khubor ba la wan na ka kynhun ED ha ka jingïakren bad ki nongthoh khubor. Une u Agent u dei ujuh u briew uba la die ruh ïa ka jaka sha uwei u heh spah uba na NRI u CC Thampi, la ïathuh ka tyllong khubor.
Kum ka jingai jubab ha kaba ïadei bad ka kaiphot ba la wanrah da ka kynhun ED kaba la buh ïa ka kyrteng jong ka Priyanka Gandhi ha ka mukotduma, u nongïalam jong ka seng Congress bad u heh nongïalam jong ka seng ha Karnataka u DK Shivakumar u la ong ba ym don mano mano ruh hapoh ka seng jong ki ki ban sheptieng ban leit sha patok.
“Ki (BJP) tharai ba ngin sheptieng lada ngi leit shong patok. Em ngim tieng shaphang kata. Ngi tip ïa ka aiñ ha kaba ïadei bad ki jaka puta. Ki shu pyndonkam ïa kine ki kynhun tang ban pyntieng pynsyier ïa ngi. Ban ïada ïa ka synshar paidbah bad ka ri, ngi la ïakhun tyngeh,” la ong u Shivakumar.
