Ankara, Nohprah:
U President jong ka Turkey, u Recep Tayyip Erdogan ha ka Sngi Balang u la ong ba kam shym don kano- kano ruh ka jingiapher hapdeng u Myntri Rangbahduh ka Israel- u Benjamin Netanyahu bad u Adolf Hitler namar ka jingleit hiar thma jong ka Israel ia ka Gaza ha kane ka sien ka la long thik kumba leh u Hitler ha ki por ba la leit. Namarkata u Erdogan u la ong ba u Netanyahu um shym don jingiapher eiei na u Hitler.
Hynrei ka jingiapher hapdeng jong kitei ki arngut ki nongialam, u Erdogan u la ong ba dei tang ka jingriewspah ba u Netanyahu u kham don bad kham riewspah ban ia u Hitler namar baroh ki jingiarap bad jingkyrshan ki wan na West bad na ka United States.
La ong ba utei u nongialam ka Turkey u la ju pynrem bad kren pyrshah ia ka jingleh jong ka Israel na ka por sha ka por, khamtam haba iadei bad ka jingïap jong ki paid nongshong shnong ba lui-lui jong ka Gaza tang namar ka jingshun thlong mluh- thlong sying jong ka Israel ia ka kynhun lehnoh Hamas, hynrei kam shym la pyrkhat ne ailad shuh pat ia ki mynsiem ba lui-lui ba kin shu iap duh khlem pat dei por tang namar ki jingther bom ba khlem sangeh jong ka Israel sha kylleng ki bynta jong ka Gaza Strip katba ka thma ka dang iai bteng bad iai neh.
Namar kata ruh u Erdogan u la pyn iaryngkat ia ka Israel bad ka ri lehnoh namar ka jingleit thombor dusmon bad jing pynhiar kput jong ka Israel ia ka Gaza khlem jing isynei.
Katba, na ka liang u nongialam ka Israel ruh, u Netanyahu u la ther kylla ia u Erdogan halor katei ka jingkren pyrshah jong u ia ki jingleh jong ka Israel bad u la ong ba u Erdogan u kwah ban ai jingkyrshan ia kitei ki lehnoh ka Palestine kiba synshar hi hapoh Gaza mynta la katto katne snem.
Kumjuh ruh u Netanyahu u la kynnoh ba ka Turkey ka ai jingkyrshan ia ki lehnoh Hamas watla ki la tip ba ka jingleh jong ki shipai ka Israel ka long ban iada ia ki paidbah nongshong ym tang jong ka Israel hynrei ki paidbah jong kiwei kiwei ruh ki ri kiba lah ban shah thombor bad shah hiar thma ha kitei ki lehnoh Hamas lada ym shym tehlakam noh ne pynduh bor noh ia ki ha kane ka sien mynta.
Kumba la tip bad ïohsngew ia ki khubor ba ki lehnoh Hamas ki la leit ban hiar thma ia ka Israel naduh ka 7 tarik u Risaw jong une u snem 2023, ha kaba palat 1,200 ngut ki nong Israel kynthup ia ki shipai bad ki briew ba nabar ka Israel, ki la khlad ha katei ka jingleit hiar thma jong ki lehnoh Hamas. Dei kane ruh ka daw kaba la pynlong ia ka Israel ba kan shun thlong mluh- thlong sying ia ka kynhun lehnoh Hamas bad ka la smai ruh ban pynduh jait bad pynjah noh syndon ia ka kyrteng jong katei ka kynhun lehnoh ba shyrkhei jong ka Palestine. Nalor katei ka jingleit hiar thma ba kyndit ia ka Israel, ki lehnoh Hamas ki la leit rung ruh sha ki shnong ba khappud jong ka Israel, ha kaba ki la leit ban khrai khlieh naphang ia ki khyllung- khynnah bad ia ki paidbah nongshong shnong jong ka Israel ha katei ka 7 tarik u Risaw. Nalor kata, ki la rah bor ruh sa kumba 200 ngut ki briew na Israel, ha kaba bun ruh ki dei kiba nabar jong ka Israel bad kiba shu leit jurip ne shong shipor ha Israel hynrei ki la ngat lang ha katei ka jingleit thombor jong ka Hamas pyrshah ia ka Israel ha une u snem.
Kumjuh ruh la ong ba ka Israel ka la pynhiar kput bad ka la ther ‘namding naphang sha Gaza haduh ba da ki 21,110 tam ki nong Gaza ki la khlad bad duh ei la ka jingim ha katei ka jingther bom ba khlem sangeh jong ka Israel naduh ba sdang jong ka tham haduh kine ki sngi ba mynta.
Kham bun hi na kitei kiba khlad hapdeng ka jingleit hiar thma ka Israel sha Gaza ki dei ki longkmie bad ki khyllung- khynnah. La iathuh ruh ba napdeng kitei ki arphew hajar tam kiba khlad, kumba 55,000 tam pat ki dei kiba la ngat bad mynsaw ha katei ka thma bad kumta ka long kaba eh ia ki tnat sumar jong ka Gaza ba kan sumar bad pyniaid ia ki kam ki jam baroh ha kum kane ka por kaba dap da ki jingkulmar kat sha ba phai namar jong ka thma hapdeng ki lehnoh Hamas bad ka Israel.
