Shimla, Nohprah:
Ki lajan kot sha ka 1.5 lak ngut ki nongleit jngohkai pyrthei kiba la leit jngoh ïa ka Shimla ha ka aïom Khristmas bad kumba 80,000 haduh 1 lak ngut ki nongjngohkai pyrthei la khmih lynti ba kin sa don bynta ban rakhe ïa ka Snem Thymmai, la ïathuh u heh pulit.
“Ha kaba ïadei bad ka jingkhmih bniah kumba ka long ha ka Khristmas bad ki jingrakhe lehkhmen ha ka aïom Tlang, ngin sa pynbiang kumjuh na ka bynta ka 31 tarik, Nohprah. Ngi la don lajan 1.5 lak ngut ki nongleit jngohkai pyrthei ha ka Khristmas bad ngi la khmih lynti ba kin sa don sa kumba 80,000 haduh 1 lak ngut ki briew bad jan 2,50,000 tylli ki kali ha bakut une u snem,” la ong u Superintendent of Police jong ka Shimla u Sanjeev Kumar Gandhi.
“Ha ka nongbah Shimla, ha ki 10 haduh 11 sngi, ngi la ïohlum jingtip ba ki la don kumba 1,60,000 tylli ki kali kiba la ïaid lyngba ka Shoghi Barrier. Ngi la don lajan 3 lak ngut ki nongshong shnong, bad ngi la pdiang burom ïa ki nongjngohkai pyrthei. Ngi la don jingthmu na ka bynta ban pynap ki jaka pynsangeh kali kiba 1 minit kumba dei bad kane kumba la khmih bniah ka long kaba myntoi bad ha ki surok kiba don hapoh ka nongbah ngi la ai jingbit ïa ki kali ba kin ïaid khlem da donkam siew,” u la bynrap.
U SP jong ka Shimla u la pyntip shuh shuh ba ka tnat ka la pyntreikam bha ha kaba ïadei bad ka rukom ïaid ki kali ha ryngkat ka jingbuh ïa ki CCTV bad ki Drone. “Ngi la pynbeit ryntih bha ha kaba ïadei bad ki jaka rung jaka mih ha Shimla, kiba kynthup ha Ridge, Kufri, Narkanda bad kiwei pat ki jaka. Ngi la pyntreikam ïa ki CCTV bad ki Drone na ka bynta ban khmih bniah ha ki lad ba ïaid ki kali bad kumjuh ban khmih bniah ïa ki briew kiba ïaid lynti. Ngi la pyrshang katba lah ban pynïoh ka jingshngaiñ, ka jingïada bad pynbeit bha ha ki rukom pynïaid kali, bad ngi la synran lang ruh ïa ki nongshangkai pyrthei,” u la bynrap.
Kumba la sakhi, la ong ba ki briew na kylleng ki jaka ki ju pyllait por na ka bynta ban leit jngoh kai khamtam ha ka aïom Tlang na ka bynta ban don bynta ha ki jing-rakhe lehkmen bad kumjuh ban lehkmen na ka bynta ka jingwan jong u snem Thymmai ha Himachal Pradesh.”Ha une u snem ba mynta ngi la wan ha ryngkat ka jingkyrmen ba kan sa don ka jinghap jong ka ïor. Ka jinglong jong ki lum ka la pynitynnad shisha. Namar ka jingwantuid jong ki nongjngohkai pyrthei ka la shim por ïa ngi ban poi sha ka jaka ba ngi thmu ban leit, hynrei ngi sngewtynnad ïa ka,” la ong uwei na ki nongjngohkai pyrthei u Gulshan, na Noida.
