Nagpur, Nohprah:
Ka seng Congress ka thmu ban pynlong ïa ka jingïalap ilekshon jong ka Lok Sabha ha u snem ban wan da kaba pynlong shwa da ka jingïalang paidbah kaba heh ba la tip kum ka ‘Hain Tayyar Hum’ ha nongbah Nagpur kaba don ha Maharashtra ha ka sngi Palei, kaba long ka sngi ba la rakhe ïa ka jingdap139 snem jong ka jingseng ïa ka.
“Kan long ka dak jong ka jingsah kynmaw na ka bynta ki briew jong ka ri,” la ong u heh nongïalam jong ka seng Congress ha Maharashtra u Nana Patole ha ka sngi Balang ha ka por ba u la ai jingkren ha ka jingïalang bad ki nongthoh khubor ha ka jaka ba la dei ban pynlong ïa ka jingïalang paidbah.
Ka seng kan sa ai jubab kaba biang ha kaba ïadei bad ka jingïakhun pyrshah ïa ka seng Bharatiya Janata Party (BJP) ha ka sorkar kmie, u la ong.
U President jong ka seng Congress u Mallikarjun Kharge bad ki heh nongïalam barim jong ka seng kiba kynthup ïa ka Sonia Gandhi bad u Rahul Gandhi ki la ai jingkren ha kane ka jingïalang paidbah ba la pynlong hynnin ka sngi.
“Ka jingïaid paidbah, ha ryngkat ka phang ‘Hain Tayyar Hum’ (kaba mut ba ngi la long kiba la khreh), ka la ai ka khubor ba bha ha baroh kawei ka ri. Ka seng Congress kan sa pynriew ïa ka turoi na ka bynta ka ilekshon Lok Sabha ha u snem ban wan,” la ong u MLA jong ka seng na Nagpur u Nitin Raut ha ka jingïakren bad ki nongthoh khubor.
Ka jingpynkhreh ha kaba ïadei bad ka jingïalang paidbah ka la ïaid beit nadong shadong ha kaba ïa kane la pynlong ha ka shnong Dighori kaba don ha Nagpur ha kaba da ki lak ngut ki briew bad ki nongbud jong ka seng Congress ki la ïashim bynta ha ka jingïalang paidbah, la ïathuh ki nongïalam jong ka seng.
