Aizawl, Nohprah:
Ki heh ka tnat Excise bad Narcotics Department ha Mizoram, ha ka sngi Palei ki la ïoh ban kurup ïa 835 grams u Heroin uba la kot sha palat T. 5.84 klur. Arngut ki nongkhaïi drok kiba la shahkem ha ka thaiñ Mualzen kaba don ha Champhai distrik jong ka Mizoram hajan khappud Myanmar ki la don bynta ha kane ka jingjia.
Ïa kine ki arngut kiba la shahkem la tip kyrteng kum u Lalngaihawma (26), uba dei u nongshong shnong jong ka Nghalchawm ha Mamit distrik bad u Lalruattluanga (28) jong ka Ainawn kaba don ha Aizawl, Mizoram.
Ïa u Heroin la ïoh ban kurup katba dang thmu ban khaïi shabar ka Mizoram, la ong ka tyllong khubor ba la wan na ka jingthoh ba la phah. Kine ki arngut kiba la shah kynnoh ki la shah pynngat hapoh ki kyndon jong ka Narcotic Drugs & Psychotropic Substances Act, 1985, la ong ka jingthoh.
Ka tnat Excise bad Narcotics Department ki la pynlong ïa ki jingkhynra ban pyrshah ïa u drok ha kine ki aïom rakhe lehkmen ïa kaba la sdang naduh ka 18 tarik, Nohprah ha ryngkat ka jingïatreilang bad ki NGO.
Ha ka por jong ka jingpyntreikam kaba la long ha ka 28 tarik, Nohprah, kane ka tnat ka la ïoh ban kurup ïa shibun u drok bad ka kyiad kynthup ïa 1.9 kilogram u Heroin, 9.8 kilogram ki Methamphetamine Tablet, 230 grams u Ganja bad palat 2100 liter ka kyiad pyrsi.
