Jerusalem, Nohprah:
Katkum ka kaiphod ba la ioh hadien ka jingwad bniah halor ka jingpyniap jong ki shipai Israel ia ki briew lajong kiba shah setkut ha kawei ka ïingmala kaba don hapoh Gaza, la ong ba ki shipai Israel kim shym pynsngap ia ka jingiam bad jingpyrta iarap jong ki briew ba shah rahbor bad shah set ha ki lehnoh Hamas hynrei ki la ther kuli bad siat naphang kat ia kiba don ha katei ka jaka bad ong pat ba ka long tang ka jingbakla ba kim tip ba ki dei ki briew jong ka Israel kiba pyrta bad kiba don ha katei ka jaka.
Hynrei katkum katei ka kaiphod ba la ioh ha kane ka por, la ong ba kitei ki shipai Israel ki la ïohsngew ia ka jing pyrta bad pan jingiarap jong kitei ki briew ba shah rahbor bad kiba don ha katei ka jaka ha ka 10 tarik jong une u Nohprah. Pynban la ong ba ki shipai Israel kim shym sangeh bad kim shym sngap satia ia katei ka jingpyrta bad ki la leit ban ther naphang ia kat kiba don ha katei ka jaka.
Kumta la ong ba ki shipai Israel ki la ther da ki bom bad ki ‘namding sha katei ka ïingmala bad hadien ba katei ka ïingmala ka la julor bad um ha kitei ki bom jong ki shipai Israel, ki shipai Israel da ka mynsiem shit rhem ki la leit tur bad siat naphang ruh ia ki 5 ngut kiwei pat ki dkhot ka kynhun lehnoh Hamas kiba dang pyrshang ban phet krad na katei ka jaka ha katei ka por.
Hynrei kaba kham sniewbok ka long ba kitei kiba shah rahbor bad kiba la lait phet lang na katei ka jaka ha katei ka 10 tarik, hadien 5 sngi (15 tarik u Nohprah) ki shipai Israel pat ki la siat kylla ia kitei ki briew jong ka Israel da kaba ithuh bakla bad mutdur ba ki dei ki dkhot jong ka kynhun lehnoh Hamas.
La ong ba kitei ki briew ba shah rahbor bad kiba la lait phet hynrei ki la shah siat noh ha ki shipai Israel hi, ki la shu iaid sa tang ka patlun bad kim don shuh ka sopti ha ka met jongki bad uwei na ki u rah ia ka lama lieh ha ka kti jong u kum ka dak jong ka jingsuk bad jing pyndem.
Hadien katei ka jingjia, u Myntri Rangbahduh ka Israel- u Benjamin Netanyahu u la ai jingkren bad ong ba katei ka jingjia ka la pynpait dohnud ia u bad ia ka ri hi baroh kawei namar ki shipai jong ka ri ki la ioh kum siat bakla ia la ki jong ki briew ha ka jingshisha kitei ki 3 ngut ki la dei ban ioh lait im hadien ba ki la lait phet na ka kti ki lehnoh ha katei ka 10 tarik.
