Mangaluru, Nohprah:
Kumba la sakhi, la ong ba ka Mangaluru International Airport ka la long kawei napdeng ki kad liengsuiñ kaba la shah byrngem thombor ha kaba ka la ïoh ban pdiang ïa kum kine ki khubor lyngba ki Email kaba la long ha ka miet jong ka sngi Ba-ar da uwei u briew uba la phah bad kam ba u dei na ka kynhun lehnoh ba la tip kum ka ‘Funing,’ la ïathuh ki heh pulit.
Ka Email kaba la wan na ka ‘[email protected]’ ka la ong: “La don ki bom ha kawei na ki liengsuiñ jong phi. Kumjuh ruh hapoh ka liengsuiñ jong phi. Ïa ki bom la buhrieh bha, bad kine kin sa bthei tang hadien khyndiat kynta. Ngan sa pynïap ïaphi baroh. Ngi dei na ka kynhun lehnoh ba la tip kum ka ‘Funing'”.
Ki heh ba dei khmih jong ka jaka sangeh liengsuiñ ki la lap ïa ka Email ha ka por 11.20 jong ka step sngi Balang bad mar mar ki la pyntip ïa kane sha ki pulit jong ka nongbah, ha kaba kine khlem da pynslem ki la pynlong ïa ka jingkhmih bniah ïa ki liengsuiñ.
U Commissioner jong ki pulit ka nongbah u Anupam Agarwal u la ong ba la pynkhlaiñ ïa ki kynhun pahara shabar jong ka jaka sangeh liengsuiñ da kaba buh shuh shuh ïa ki Check Post.
Ka la don ka jingkhynra bad ka jingkhmih kaba bniah ïa ki liengsuiñ hadien ka khubor pyntriem, la ong u Commissioner, u la bynrap ba ka jingpyntreiakm ka dang bteng.
U Inspector jong ki pulit ka Bajpe ruh u la pynlong ïa ka jingïalang bad ki heh nongpynïaid jong ka Airport, ki pulit ki la buh da ka jingmudui pyrshah ïa uba phah ïa kane ka khubor byrngem hapoh ka kyndon 507 jong ka IPC hadien ba ki la ïoh jingbit na ka ïingbishar ha kane ka thaiñ.
