Ottawa, Nohprah:
Katkum ki khubor, la ong ba ha ka Sngi Balang la ïohsngew ia ka jingriew ktang suloi ha kawei ka iing jong u nong India uba sah hapoh ka thaiñ Surrey jong ka ri Canada. Hadien kane, ka tnat pulit Royal Canadian Mounted Police ka la buddien bad phah wad bniah halor katei ka jingjia ban lap ia kaei kaba la jia baroh.
La ong ba katei ka la jia ha ka step jong ka Sngi Balang (27 tarik u Nohprah) ha ka iingsah u khun jong u Satish Kumar, uba long u President jong ka Lakshmi Narayan Mandir hapoh Surrey. Hynrei ki pulit ki la pyntip pat ba ha katei ka jingjia, ym shym la don ba ngat ne mynsaw eiei.
Katkum ka khubor na ki pulit jong katei ka thaiñ, la ong ba katei ka jaka ka don ia ki dak mong kuli ha ki kynroh bad ki jingker jong katei ka iing.
Kumta, katei ka tnat pulit ka la phah ia ki kynhun pulit bad ki bor pahara ban leit ap pahara bad ban pyntikna ia ka jinglong- jingman ha katei ka thaiñ bad ka RCMP General Investigation Unit ka la pynlong ruh da ka jingtohkit kaba bniah bad la bthah ia ki heh ophisar ba dei khmih ba kin wad bniah halor ka daw bad ka jingthmu ba sha lyndet jong katei ka jingjia.
Watla katta, ka tnat pulit na Surrey kam shym la pyntikna ba katei ka jingjia kan don jingiadei eiei bad ki kam thombor ne ki jingshah byrngem jong ka Lakshmi Narayan Mandir hapoh Surrey.
