Shillong, Nohprah 29
Haba ïadei bad ka jingkynjoh ïa uwei pat u mawmer ha ka liang ki lad pynïasoh ka juk stad ba mynta, ka Sorkar Jylla ka la pynbna ïa ka jingseisoh halor ka jingsdang jong ka ‘Tura Link’, da kaba pynbiang ïa ka lad pynïasoh ‘internet’ kaba don ïa ka jingsted kaba 100 Mbps.
Kane ka sienjam kaba la lamkhmat da ka tnad Information Technology & Communication (IT & C), ka long u mawjam ba kongsan haba phai sha ka projek ‘Last Mile Connectivity’ jong ka Jylla.
Ïa kane ka projek la pynwandur ban kner ïa ki lad pynïasoh lyngba ka ‘internet’ sha ki jaka ba kyndong tam jong ka Jylla, ha ryngkat ka jingpyntikna ba baroh ki nongshong shnong ki lah ban ïoh jingmyntoi ha ka liang ka juk stad pyrthei ba mynta.
Ki jingjop ba dang shen haba ïadei bad ka jingpynbiang ïa ka ‘Mbps link’ kaba 100 sha Tura ka long ka sakhi na bynta ka jingminot ka Jylla ban kyntiew ïa ki lad pynïasoh ha kylleng ka thaiñ, da kaba buh jingmut ha kajuh ka por, ïa ki jingtynjuh kiba ka Jylla ka ïakynduh ha ka jinglong-jingman ka jaka.
U Myntri Rangbah ka Jylla, u Conrad K. Sangma u la pynpaw ïa ka jingkmen bad ong, “Une u mawmer uba la kynjoh ha Tura u long u mawjam uba kongsan haba ïadei bad ka jingïohi jngai jong ka Meghalaya kaba biang ha ki lad pynïasoh katkum ka juk stad ba mynta. Ngin minot ban pyntikna ba ki jingmyntoi jong ka juk stad ba mynta ki poi sha man la ki nongshong shnong bad ka projek ‘Last Mile Connectivity’ ka long kaba kongsan ha kata ka liang.”
Ha kajuh ka por, u la ai jingïaroh ïa ki jingpyrshang jong ka tnad IT & C, Powertel, bad MeECL halor ka jingminot jong ki ban pynurlong ïa kane ka jingïohi jngai sha ka jingshisha.
“Ka Sorkar Jylla ka khmih lynti ba kin nang bun shuh ki jingïatreilang katba ka nang ïai bteng ban trei ha ka ban pynkylla ïa ka jinglong-jingman ka juk stad ba mynta (digital) jong ka Jylla, kumjuh ban kyntiew ïa ka ïoh ka kot, bad ka rukom im jong ki briew jong ngi,” u la ong.
Na ka liang u Commissioner & Secretary ka tnad IT & Communications, u Pravin Bakshi, IAS, u la ong, “Ka jingbym biang ka lad pynïasoh ‘internet’ kaba shaniah ha Ri-lum Garo ka buh jingeh shi kat dei bad ktah ïa ki kam ba donkam bad pynthut ruh ïa ki tnad treikam kum ka pule-puthi bad ka koit ka khiah. Ka ‘Tura Link’, kaba long shi bynta jong ka projek ‘Last Mile Connectivity’ mynta ka la rat dyngkhong lut ïa kine ki jingeh baroh. Da ka jingsted kaba 100 Mbps, ki nongshong shnong mynta ki lah ban ‘download’ ïa ki kot ki sla donkam, ban pyntyllun ïa ki kam khaïi jong ki, ki jingsiew nalor kiwei-kiwei. Kane ym tang ba kan weng ïa ka jingeh ha ka liang ka juk stad ba mynta, hynrei ka kyntiew ïa ka ïoh ka kot bad ka imlang-sahlang ha Ri-lum Garo.”
