Beirut, Nohprah:
Katkum ki khubor, la ong ba ka jingther bom jong ki shipai Israel sha Lebanon ka la shim ia ka jingim jong uwei u dkhot ka kynhun lehnoh Hezbollah. Kane ka long katkum ka khubor ba la pynbna hi da ki nong-ialam jong katei ka kynhun lehnoh na Lebanon ha ka Sngi Balang. Ha katei ka jingjia, la ong ba 2 ngut ki bahaiing jong u ruh ki la khlad lang bad duh noh ia ka jingim hapdeng ka jingther bom jong ka Israel sha katei ka bynta.
Namar la ong ba ha katei ka thaiñ khappud jong ka Israel bad ka Lebanon ki la mih bun tylli ki jingiakynad hapdeng ki bor pahara ka Israel bad ki lehnoh jong katei ka ri kiba don ha kitei ki bynta khappud hynrei la ong ba ka jinglong-jingman ha katei ka bynta khappud ka la nang sniew shuh-shuh naduh ba jia ka thma ka Israel bad Gaza ha une u snem 2023.
La ong ba ki nong-ialam ka Hezbollah ha katei ka sngi ki la iathuh ba ki liengsuiñ thma jong ki nongshun ki la leit ban her tawiar ia ki bynta ba don ka iingsah jong utei u dkhot ka Hezbollah ha ka por shiteng miet ha ki bynta phang pdeng jong ka shnong Bint Jbeil, kumba 2 Kilometre na khappud, ha kaba kitei ki liengsuiñ thma ka Israel ki la leit ban ther bom sha katei ka jaka bad kaba la shim ia ka jingim jong utei u dkhot ka kynhun lehnoh Hezbollah, u hynmen bad ka kurim jong u hynmen jong u kiba ïadon lang ha katei ka jaka ha katei ka miet.
Ka NNA ka la pynithuh ia kitei kiba khlad kum u Aili Bazzi, u hynmen jong u- u Ibrahim bad ka kurim jong utei u Ibrahim- ka Shourouk Hammoud. Katba la ong ba dang don ruh sa uwei u dkhot jong katei ka iing uba la ngat bad mynsaw ha katei ka jingleit ther bom jong ki liengsuiñ ka Israel sha khappud Lebanon.
Hadien ba la ïohsngew ia katei ka khubor, ka Hezbollah ka la pynbna ba mu Ali Bazzi u long u dkhot jong katei hi ka kynhun bad dei na kane ka daw ba ka Israel ka leit ban thombor ia katei ka jaka ba don utei u dkhot jong ka kynhun lehnoh Hezbollah.
Uwei na ki bahaiing jong utei u lehnoh, la ong ba u Ibrahim Bazzi u dei u nongshong shnong pura jong ka Australia uba la leit poi sha Lebanon dang ha ka taiew ba la lah ban leit jurip ia utei u para jong u sha katei ka shnong.
Kumta, ha katei ka sngi ba leh burom khatduh ia ka met jong kitei ki 3 ngut, la iohi ia 3 tylli ki synduk metiap ba la tap da ka lama jong ka kynhun lehnoh Hezbollah bad ba la ioh ban pyndep ia ka jingleh burom baroh ha ryngkat ka jingiadon lang jong kitei ki nongialam bad ki dkhot katei ka kynhun lehnoh ha katei ka sngi.
Kumjuh ruh na ka liang ka Hezbollah ha ka Sngi Balang ka la pyntip ba ka la dep ther kylla sa 30 tylli ki ‘namding ‘Katyusha’ sha ki bynta Kiryat Shmona kaba don sha ka phang Northern jong ka Israel, kum shi bynta ban pynphai kylliang ia ki jingleh dusmon jong ka Israel ban ther bom sha ki jaka ba shong ki riew paidbah hapoh Bint Jbeil.
Shuh shuh ruh la ong ba naduh ba sdang ka jingiakynad hapdeng ki lehnoh Hamas bad ka Israel, ka jingdon kiba khlad na ka jingiakynad hapdeng ki lehnoh Hezbollah jong ka Lebanon bad ka Israel ka la kiew sha ka 150 tam na ka liang jong ka Lebanon, kham bun na kitei kiba khlad ki dei hi pat tang ki dkhot jong katei hi ka kynhun lehnoh Hezbollah hynrei don pat kumba 20 ngut kiba long tang ki riew paidbah kiba shong- ba sah hajan kitei ki bynta ba don ki lehnoh Hezbollah.
Katba na ka liang jong ka Israel pat, ka jingdon kiba khlad na ka jingther bom bad jingther ‘namding ka Hezbollah ka la long tang da ki khat’ ngut, ha kaba 4 ngut ki dei ki riew paidbah bad kumba 9 ngut ki dei ki shipai ne ki bor pahara jong ka Israel kiba ngat ha kitei ki jingther bom jong ki lehnoh Hezbollah sha Israel.
