Shillong, Nohprah 29
Hadien ka jinglah ban pynurlong ïa ka Narendra Modi Cricket Stadium kum kawei na ki stadium kaba heh duh ha ka pyrthei, ka Ahmedabad mynta ka la khreh ban pynïeng sa haduh san tylli ki stadium, kynthup ïa kawei ka football stadium kaba ïaryngkat bad ki ri ka pyrthei.
Kat kum ka kaiphod ba la pyllait da ka Desh Gujarat la ong ba kane ka khubor ka la saphriang ha ka Sardar Vallabhbhai Sports Enclave, kaba dei ka projek kaba dang tei mynta na ka bynta ka cricket stadium bad kaba lah ban ngiam haduh 130,000 ngut ki paidbah nongpeitkai.
Kine ki stadium kiba dangkhreh ban tei thymmai kin long kiba ïaryng-kat kyrdan ba ki stadium kylleng ka pyrthei (international standard football stadium), kiba lah ban long syriem kum ka Kalinga Stadium ha Bhu-baneswar na ka bynta ka jingïalehkai phutbol.
Kat kum ka kaiphod la ong ba kane ka stadium na ka bynta ka jingïalehkai phutbol lem bad saw tylli kiwei pat ki projek ki dei kiba la ïoh jingmynjur lyngba ka Sorkar Pdeng lem bad ka Sorkar jong katei ka Jylla. Te kumta ka jingpynkhreh ka dangïaid shakhmat bad na ka liang ka Ahmedabad Urban Development Authority ka la khot tender na ka bynta kine ki jingtei.
Kumba ka paw na ka liang ka Sorkar Pdeng ka la pynkhreh ban ïoh pynlong ïa ka Olympics ha u snem 2036, te kumta na ka liang katei ka nongbah jong ka Gujarat ka la ïaid shakhmat ban pynbiang ïa ki jaka ïalehkai kiba paka khnang ban pynurlong ïa katei ka jingthmu.
“Ka ri India ka la thrang ban ïoh pynlong ïa ka Olympic Games. Ka India kan ym shongthait ban pynkhreh lypa na ka bynta ban pynlong ïa katei ka lympung ha u 2036,” la pynpaw dangshen da u Myntri Rangbahduh u Narendra Modi.
“Kane ka dei ka jingangnud da ki 140 crore ki nongshong shnong ka ri India. Ngi kwah ban pynurlong ïa ki jingangnud lyngba ki jingkyrshan lang ki jong phi. Ngi kwah ruh ban ïoh pynlong ïa ka Youth Olympics ha u 2029. Nga thikna ba ka India kan ïoh ka jingkyrshan lang na ka IOC.”
Ha kawei pat ka liang u Thomas Bach, uba long u President ka Interna-tional Olympic Commit-tee ha ka jingwan dangshen ka jong u sha India, u la kyrmen skhem ba kane ka jingthmu jong ka India ka dei ban urlong.
“Mynta ngi ïohi ba ka India ka la ïaid shakhmat ban pynbiang ïa ki jaka ïalehkai kiba paka namar ba ka thrang ban pynlong ïa ka Olympic. Te kumta ngi pdiang sngewbha ïa kane ka jingthmu jong ka,” la ong u Bach.
Shuh shuh na ka liang ka Sorkar Pdeng bad ka Ahmedabad ki la don ka jingïamir jingmut lang na ka bynta ka Commonwealth Games 2026 hadien ka jingweng noh ka Victoria ban pynlong ïa kane ka lympung.
