Pynpaw u Siddaramaiah sa ka kyrteng u Rahul ban ïakhun ïa ka shuki Myntri Rangbahduh

Bengaluru, Nohprah:

Hadien ba ka kynhun synrop INDIA ka la ban jur ban pynlong kyrtong da u Mallikarjun Kharge na ka bynta ban ïakhun ïa ka shuki Myntri Rangbahduh na ka bynta ka ilekshon Lok Sabha, u Myntri Rangbah jong ka Karnataka u Siddaramaiah ha ka sngi Palei u la pynmih da ka kyrteng jong u Rahul Gandhi ba un mihkhmat ban ïakhun ïa ka shuki Myntri Rangbahduh ha ka ilekshon.

“Dei tang ka seng Congress ka ban lah ban weng ïa ki jingeh kiba la ktah ïa ka ri, bad na ka bynta kane, u Rahul Gandhi u la dei ban long u Myntri Rangbahduh,” u la ong ha ka jingïakren bad ki nongthoh khubor.

“Ym don mano mano ruh ha ka ri ki ban lah ban leh kum ka Bharat Jodo Yatra. Mynta u Rahul Gandhi u la shim ïa ka sienjam kaba ar ka Nyay Yatra. Kane ka long namar ba ym baroh ki ïoh ïa ka jingbishar bahok ha ka ri, kiba kynthup ïa ka kynhun ba dang sahdien, ki Dalit, ki ritpaid bad ki longkmie,” la ong u Siddaramaiah.

“Namar kata, la dei ban don sa mano mano kum u  Rahul Gandhi ban ïoh ïa ka bor ne u Narendra Modi? Ngi la dei ban tep noh ïa baroh ki jingïapher jingmut na ka bynta ban pyllait im ïa ka ri bad ban ïada ïa ka Riti synshar, ban wanrah ïa ka jingïamynjurlang bad ka synshar bahok. Ngi la dei ban wanrah biang ïa ka seng Congress bad ban pynlong Myntri Rangbahduh ïa u Rahul Gandhi,” u la ong.

Wat ha u snem 2019, u Siddaramaiah u la pynpaw da ka kyrteng jong u Rahul Gandhi kum u Myntri Rangbahduh.

U la kynnoh shuh shuh ba ka seng BJP ka la pyrshah jur halor kane ka jingthmu.

U la ong ruh ba ka la don ka jingïapher hapdeng ka niam Hindu bad ka Hindutva, u la kynnoh ba ka seng BJP ka dei ka seng Hindu kaba thok.