Khliehriat, Nohprah 29
Ka Deinchynrum SC ka la rah ïa ka nam lahduh ha ka lympung ïalehkai ki kynthei ba la tip kum ka ‘(L) Mary Tlang Memo-rial Trophy’ ba la pynïaid da ka East Jaiñtia Hills District Football Asso-ciation (EJHDFA).
Kane ka nam jop ka la wan hadien ba ka Dein-chynrum ka la lah ban pynliem noh da 3-0 kol ïa ka Dkhiah West SC ha ka jingïakhun phainal kaba la long ha madan phlang plastik kaba don ha Diengshynrum, Khlieh -riat ha ka 27 tarik.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei ka Deinchynrum ka la long ka kynhun kaba kham khlaiñ bor ha kaba ka Alisha Lyngdoh ka la ïoh ban pynkhih jar nyngkong ha ka minit kaba 8. Kane ka shi kol ka la ïai haduh kaba kut jong ka kylla step na ka daw ba liang pyrshah kam shym la lah ban pynphai.
Hadien katto katne por ba la bteng ïa ka jingïakhun jong ka kylla miet, ka Deinchynrum ka la pynbud biang ïa ka kol kaba ar lyngba ka Happily Lyngdoh ha ka minit kaba 60. Hashwa ban wai kane ka kynhun ka la thep biang sa shi kol lyngba ka Deimon Lyngdoh ha ka minit kaba 70+1 na ka bynta ban khur syndon ïa ka jingjop.
Ïa ka khusnam sha ka kynhun lahduh ka Dein-chynrum SC la sam da ka Kong Pawlina Tlang kaba dei ka khun jong ka (L) Mary Tlang, katba ka khusnam sha ka kynhun kaba wan ba-ar la sam da ka Kong Merun Tlang kaba dei ka khun ksiew jong ka (L) Mary Tlang.
La sam ruh ïa ka khusnam Player of the Day sha ka Alisha Lyngdoh ka Deinchyntum SC, Emerging Player ka leit sha ka Pari Khongngain na Dkhiah West SC bad ïa kine ki khusnam la sam da u Bah Welbert Nongtdu, Waheh Shnong Deinchynrum SC bad Bah James Sutnga, Working President EJHDFA.
Ha kane ka sngi la donlang ruh ki riew rangbah jong ka kur Tlang kynthup naduh u Bah Treyo Tlang, Tommyna Tlang, Comingone Joy Tlang bad ki khun ki ksiew jong ka (L) Mary Tlang ka Kong Embris Tlang nalor ki dkhot bad nongkitkam ka EJHDFA.
