Jowai, Nohprah 29
Ka West Jaiñtia District Table Tennis Association (WJHTTA) ha ka sngi Thohdieng ka la pynlong ïa ka lympung ïalehkai ba shi sngi ba la tip kum ka ‘Open One Day Tournament’ ha Kiang Nangbah Indoor Stadium, Jowai.
Ha kane ka lympung ïalehkai la wan shim bynta da 32 ngut ki rangïalehkai ha ki lai tylli ki kyrdan kata ka Under-16 Boys Singles, Men’s Singles bad Men’s Doubles.
Ha ka kyrdan Under-16 Boys Singles, u Corban D. Khonglah u la rah ïa ka nam lahduh hadien ba u la pynliem noh ïa u Kermi W Lywait da 11-5, 9-11, 9-11, 11-6, bad 11-8. Ha ka Men’s Singles, u Eraphael Dkhar u la rah ïa ka nam lahduh hadien ba u la pynliem ïa u Deonicious Chullai da 11-6, 11-8, 11-9, bad 11-7.
Ha ka Men’s Doubles, u Eraphael Dkhar bad u Deonicious Chullai ki la rah ïa ka nam lahduh hadien ba ki la lah ban pynliem noh ïa u Rabin Passah bad u Muni Kynjin da 11-4, 11-9, 11-9, bad 11-5.
Ïa ki khusnam sha ki nongjop la sam da u District Sports Officer, West Jaiñtia Hills u Bah Khroobok Passah, ha ka jingdonlang ki nongïalam bad dkhot nongkitkam ka West Jaiñtia District Table Tennis Association.
