New Delhi, Nohprah:
Saw ngut ki nongtrei jong ka Air India SATS (AISATS) bad u nongleit jingleit uba dei u nong India uba la pyrshang ban kiew ha ka liengsuiñ UK ki la shahkem ha Indira Gandhi International Airport (IGI) kaba don ha Delhi ha ka sngi Balang halor ka jingshah kynnoh jong ki ba ki la donkti ha ka kam khaïi briew.
Ki pulit jong ka Central Industrial Security Force (CISF) ki la ishan khmat ïa ka jingleh jong kine ki briew,ha kaba kane ka la pynlong ïa ki ba kin shahkem.
Katkum ka jingkhmih bniah na ki kot donkam ha kaba ïadei bad ka jingleit jingleit jong une u nong India ha ka liengsuiñ UK, u Diljot Singh, u la paw ba u la leh thok ha kaba kane ka la pynsuba sniew ïa ki heh ba dei khmih, ha kaba ki la khang ïa u ba un kiew ha ka liengsuiñ bad hukum ïa u ba un pynshai ïa baroh ha ki pulit ba dei khmih jong ka Airline.
U Singh, ha ka jaka ba un leit sha ki nongtrei jong ka Airline, u la pan jingïarap na ki nongtrei jong ka AISATS, ha kaba kane ka la pynlong ban pynkhlaiñ ïa ki bor pahara.
Ki pulit jong ka CISF, ki la don ka jingsuba sniew ïa ka jingleh jong kine ki briew, ha kaba kane ka la pynlong ïa ki ban pynlong ka jingbuddien ha ryngkat ka jingïatreilang ki heh ba dei khmih jong ka Airport.
Na ka jingkhmih bniah lyngba ki CCTV Footage la ïohi ba ki nongtrei jong ka AISATS ha ka Crew Check-n Counter ki la ïarap ïa u Singh bad arngut kiwei pat ki la pyndonkam da ki kot ki sla ba long beaiñ jong u.
Kine ki nongtrei kiba la ai jingïarap ïa u Singh ki dei kiba la tip kyrteng kum u Rohan Verma, Mohammad Jahangir, Yash, bad u Akshay Narang, ha ryngkat u Singh, ngi la aiti ïa ki sha ki pulit ka Delhi. Ka la don ka jingbuh jingujor pyrshah ïa kine ki briew.
U Sanjay Gupta, uba long u CEO jong ka AISATS, u la ong ba kane ka kompeni ka la don bynta ban khanglad ïa ki jingthmu jong ki runar ban leh ïa ki kam khaïi briew ha ryngkat ka jingïatreilang bad ki heh ba dei khmih jong ka Airport bad kumjuh bad ki CISF.
“Ki la don lai ngut ki briew kiba la pyrshang ban leit jingleit da ka lynti kaba beaiñ, bad uwei napdeng jong ki u la shahkem noh ha ka por ba la don ka jingpyntreikam. Kumjuh ki nongtrei kiba la don bynta ban leh ïa ki kam beaiñ jong ki ki la shahkem lang bad ïa kine baroh la aiti noh sha ki pulit ka Delhi na ka bynta ban leh ïa kaba donkam,” la ong u Gupta ha ka jingthoh ba la phah.
