Gaza, Nohprah:
Ki shipai Israel ha ka Sngi Palei ki la ther bom sha Gaza hadien ba la ioh ia ka khubor ba ka briew ba shah rahbor ha ki lehnoh Hamas kaba tymmen tam, ka la khlad noh ha ka kti ki lehnoh Hamas. Kumta ka Israel ha ka Sngi Palei ka la ther bom naphang sha ka thaiñ Khan Yunis jong ka phang Southern ka Gaza ha kaba da ki spah ngut ki nongshong shnong ka Palestine hapoh Gaza ki ioh jaka rieh ha katei ka thaiñ naduh ba la jia ka thma.
Haba iadei bad kane, u heh ka World Health Organization (WHO)- u Tedros Adhanom Ghebreyesus u la khot ia ki tnat bapher ban phah sangeh noh mar-mar ia katei ka thma hapdeng ka Israel bad ki lehnoh Hamas namar ka jinglong-jingman ka la nang sniew shuh-shuh bad ka la ktah jur khamtam ia ki paid nongshong shnong ka Palestine kiba don hapoh Gaza Strip.
Shuh shuh ruh la ong ba hapoh Jerusalem pat, ki bahaiing- hasem jong kito kiba la shah rahbor ha ki lehnoh Hamas, ki dang pynlong ia ki jingiakhih paidbah ban dawa pyllait noh ia kitei kiba shah rahbor baroh ha ki lehnoh Hamas naduh kaba sdang jong ka thma ha ka 7 tarik u Risaw jong une u snem 2023. Katba, la ioh jingtip noh pat ba katei ka briew kaba la don kumba 70 snem ka rta bad kaba la ngeit ba ka long ka briew ba la tymmen tam napdeng baroh kito kiba la shah rahbor ha ki lehnoh Hamas, hynrei ka la khlad noh ha katei hi ka 7 tarik u Risaw.
Kumjuh ruh na ka liang u President ka United States- u Joe Biden u la pynpaw ia ka jingsngewkhia bad phah ruh ia ka kyrwoh sngewlem halor ka jingkhlad noh jong katei ka tymmen kaba la ngeit bad khmih lynti ba kan dang im watla ka don ha ka kti jong ki lehnoh Hamas naduh katei ka 7 tarik u Risaw. Kumta ruh u Biden haba ai jingkren ha ka Sngi Palei, u la kular ba ka United States kan nym ailad ia ka kynhun lehnoh Hamas ban nang wanrah ia ki kam thombor hadien- habud bad kumta ruh ka US kan nang iai bteng ban ai jingkyrshan ia ka Israel ha ka jingiakhun ban tehlakam bad ban pynduh jait noh syndon ia ki kam thombor jong katei ka kynhun lehnoh Hamas ba shyrkhei.
