Shillong, Nohprah 29
Ka Meghalaya ka la long ka kynhun kaba nyngkong ban ïoh rung sha ka final jong ka U-16 boys’ Vijay Merchant Trophy hadien ba la lah ban pynliem noh ïa ka Nagaland da 72 run ha ka sngi Palei ha Bhubaneswar.
Ka Meghalaya ka lah ban ïakynduh pyrshah ïa ka Manipur lane ka Mizoram na ka bynta ban ïaknieh ïa ka nam lahduh, namar kine ki kynhun ki dang ïai bteng ïa ka jingïakhun semi final na ka bynta sngi kaba lai.
Ha kane ka jingïakhun u Apandanka Marak u la lah ban ïalehkai bha na ka bynta ka kynhun ïalehkai ka Jylla da kaba khur 5/45 ha ki 11 over ha kaba ka Nagaland ka la shah pynkhyllem baroh ki nongtied bad ban kamai tang 92 run ha ka inning kaba ar. U Apandanka u la khur 6/40 ha ka inning kaba nyngkong bad haba kheiñ lang u la khur 11/85 na ka bynta ban long kum u nongkawang bol ba kynsai ha kane ka jingïakhun.
Ban shu pynkynmaw na ka jingïakhun hynnin ka sngi, ka Meghalaya kaba la jop ha ka kynting pisa, ka la shimti ban tied nyngkong ha kaba ka la kamai 123. Hynrei hadien ka la lah ban khanglad ïa ka Nagaland na ka bynta an kamai tang 83 bad 22/0 ha ka inning kaba ar.
Hynne ka sngi u Aashish Kumar Lohar u la ïoh ban khyrwit ïa ka shiteng spah kaba 57 ha kaba ka Meghalaya ka la lah ban kynjoh sha ki 124 run hashwa ba kan shah pynkhyllem baroh ki nongtied. U Aashish bad u Gaurav Jyoti Thakuria (18) ki la lah ban kynjoh sha ki 57 run na ka bynta ka wiket kaba hynriew.
Lyngba ka jinglah ban tam da 40-run ha ka inning kaba nyngkong, ka Meghalaya ka la buh ïa ka thong na ka bynta ka Nagaland ha ki 165 ban khur ïa ka jingjop. Hynrei ka Nagaland ka la lah ban ban kamai tang 92 run hadien ba ka la shah pynkhyllem baroh ki nongtied.
Te kumta ka Meghalaya kan ap na ka jingmih jong ka jingïakhun hapdeng ka Manipur bad ka Mizoram.
Ka Meghalaya ka la shah rem teng ha ka Manipur ha ka jingïalehkai (group stage), hynrei ka la lah ban pynliem ïa ka Mizoram.
